Vincent Thierry × 陳俊偉 米芝蓮星閃閃

C=陳俊偉 V=Vincent Thierry

Vincent Thierry	陳俊偉	左起：主廚Vincent Thierry、經理Jeremy Evrard及首席品酒師Sebastien Allano俱來自法國知名餐廳Le Cinq，合作無間，默契十足。

米芝蓮有代表性

C： 其實我覺得以食評來說，米芝蓮指南算好專業；記得2006年去過米芝蓮總部訪問總裁Jean-Luc Naret，佢話所有米芝蓮密探（Inspector）全部係全職員工，受過專業訓練，而且大都來自酒店學校，有多年酒店、餐廳工作或管理經驗，絕對信得過。坊間雖然有不少飲食指南，但礙於不同條件，而不夠中立，我覺得好少會像米芝蓮，用咁多人力物力去做一本書，令人尊重。

法式炒黃菌伴西班牙甘腿、 意大利青杏仁配羊奶芝士 $340 炒香過的黃菌，芳香宜人；羊芝士及西班牙火腿味道濃郁，食點沙律菜可平衡味道。	法國無花果伴爆谷芝士蛋糕忌廉、黑加侖子脆糖配紅桑子蜜果雪葩 $160 做得美輪美奐的甜品，集合軟滑、香脆質感，連同雪葩品嘗，透心涼。	香燒乳豬排伴豬腳肉野菌粒、 法國血腸椰菜配川椒汁 $590 一次過嘗到幾款豬肉菜式：乳豬燒得香脆，血腸味道濃郁，豬腳肉煎炸後再燴煮，層次豐富。

V： 我同意有米芝蓮係好事，因為佢夠代表性。好似我在歐洲長大，就知道當地人對本書好熟悉好尊崇，見到餐廳有1粒星，都知唔簡單，去食飯時會抱有期望架！年前紐約出版米芝蓮，估計呢本書會受到美國人重視。

C： 大家成日話香港人對星星趨之若鶩，其實外國人更加重視，畢竟這本指南已有很多年歷史，評分制度發展得好成熟。自己在公在私都食過不少米芝蓮星級餐廳，發現3星同1星的質素，是有距離的，證明試食評分有一定準則。Vincent，咁你有冇試過跟住米芝蓮書仔搵食？

最難忘星級餐廳

V： 冇試過喎！後生時無錢嘛！但有錢又冇時間去食，哈哈！不過有時去旅行都喜歡試當地出名的餐廳。

C： 我就視乎情況、看地方而定。好似去法國玩，想食餐好，我會參考指南。我食過最好、最難忘的星級餐廳都在法國。例如Hotel de Crillon內的Les Ambassadeurs，當時它是米芝蓮2星餐廳，環境富麗堂皇，金黃色主調、大理石鑲嵌的牆壁配合大型水晶燈，入到去猶如置身王宮！主廚Jean煮的食物更是出神入化，成個體驗都好好。

V： 我試過20多間米芝蓮餐廳，最深刻的一次是在意大利的Ristorante del Pescatore，其意大利菜簡單得來好味，氣氛好好。試餐廳，我會放下廚子身份，盡量保持食客的心態，不會先問幾多粒星，將享受放在首位！

C： 對米芝蓮星星餐廳有期望在所難免。記得有次去西班牙光顧一間3星餐廳，菜式創新、賣相又靚，但食材配搭唔夠好，似迎合潮流多於食味。同行的人笑稱套餐只值50歐元，絕對不值150歐元！笑得我。點解Les Ambassadeurs得2星，西班牙的有3星？或者是觀點與角度不同囉。其實你孭住米芝蓮3粒星咁耐，有沒有壓力呢？好多外國廚子都不甘壓力和束縛，選擇「甩星」，甚至拒絕摘星。

不被星星迷惑

V： 我會用平常心看待米芝蓮星星。餐廳（Caprice）取得3星當然開心啦，但我只係開心咗1日，就提醒自己回到現實喇！我想到，客人之後會對我們有期望，甚至提高要求，我就更加要畀心機做好。當然，這不會構成壓力，無論有沒有星星都好，把菜式做好是廚子的本分。

C： 客觀點看，一間餐廳有沒有星，或有幾多粒星，係有好多因素影響嘅。你不會清楚知道評審準則，米芝蓮不似賽跑，賽跑跑得快就贏；Inspector來試食，當天食材質素、廚師和侍應的狀態都有影響，始終人手做的東西會有浮動變數，不是機器製件件一樣，或者要講一句，彩數囉！

V： 我唔會因為孭住3星名銜而改變甚麼；要保持餐廳的水準，繼續做好本分便成了。就由客人打電話來訂位開始，到進餐完畢滿意離開，才是最重要。

C： 去過你餐廳咁多次，覺得整體水準愈來愈高，各方面不斷有進步，團隊之間好有默契，能察覺和明白到客人的需要；餐牌還經常轉換，常常有新食材。

V： 冇食譜係一定摘3星的，我會選擇每日做好，而且「Be Open-minded」，不墨守成規，令客人滿有新鮮感。不過，香港有米芝蓮都係好事，因為可以提升本地食肆的水準。

C： 我諗，米芝蓮方面都覺得有市場價值，才會出版香港版，也證明本地食肆達到國際水平；而更多外國人幫襯，就有更多回響，係相輔相成的，對飲食界不是更好嗎？

陳俊偉Profile

人氣飲食及旅遊寫作人。為本地及中國內地不同報章及雜誌撰寫飲食及旅遊文章，及於電台節目《旅遊樂園》擔任主持，個人著作包括《愛上。自遊自學》、《出門賞京都》、《京都大阪神京奈良名古屋和歌山食玩買終極天書》等。

Vincent Thierry Profile

香港3星米芝蓮法國餐廳Caprice主廚，曾在海外多間知名餐廳工作，包括Le Cinq、Le Buerehiesel、Les Crayères、Le Côte Saint Jacques、Restaurant Taillevent等，擅長將新元素糅合傳統法國菜，菜式帶有驚喜。

撰文：楊淑英

攝影：梁偉德

查詢電話：3196 8888