3天學揸帆船 出海做貴族

撰文︰陳志滔　攝影︰蘇榮基　模特兒︰Irene Hui　查詢電話︰2511 9398

動靜皆宜 好玩過船河

玩帆船唔同坐遊艇，起帆、推舵、鬆帆樣樣都要落手落腳做，熱天隨時搞到身水身汗，咁有乜樂趣先？擁有9年帆船經驗的CATA教練Kevin表示︰「帆船依風而行，毋須電油及引擎推動，不但夠晒環保，而且絲毫沒有噪音，可以喺甲板聽聽海浪聲，談天歎紅酒；如想快的話又可升帆加速，跟隊友鍛煉合作精神，動靜皆宜。」Kevin更指香港四面環海，島嶼星羅棋布，航海條件極佳，與其遊船河開Party，不如自己揚帆好玩得多。

Kevin曾奪3屆學界帆船大賽冠軍，並代表香港出戰中國賽。

帆船上有齊指南針及風向計等儀器。

升起雙帆 猶如踩單車

話明帆船，當然要學懂如何起帆。其實起帆並非電視睇到的拉繩索咁簡單，基本是要把繩索綑住絞索器，一隻手拉，一隻手絞，直至適當位置才綁緊。若中途唔夠力，可裝上絞桿幫助絞繩，否則單靠人力，遇到大風必定起不了帆。升好主帆，船便有了動力，但Kevin說揸帆船就像踏單車，空有蠻力並不足夠，還要升起用作平衡的前帆才行。「另外揸帆船要長期站在甲板上，除了需穿好救生衣，還要搽定防曬霜及多飲水，以免曬傷或中暑。」

順時針轉動絞桿，有機械輔助，女仔都應付得來。	用人力把繩索綑住絞索盤，冇風時可用。	內有雙人大床，透過天窗與情人欣賞風景。

看風駛舵 大風要淡定

揚帆起錙後，便要「看風駛舵」。當順風時要盡量開帆，以增加「食風」面積；逆風時則將帆向內收緊成45度角，以Z形路線前進。若太大風或冇風點算好？「大風時最重要係不慌不忙，利用滑輪鬆帆，由於船底有龍骨，隔一段時間船自會穩定下來，就算好大風都唔會翻船。至於冇風，就要不斷推舵，直至食到風為止。」Kevin提醒初學者，初玩建議天氣理想才出海，並要揀靠岸的地方練習，遇到問題便可立刻駛入避風塘。

竟然可插iPod播歌，音響仲幾靚聲！

身價逾$300萬的新船，開派對都掂。

學揸船平過買iPhone

揸帆船感覺中產，但其實學費一啲都唔貴，例如CATA舉辦的入門班只需$3,900，比買部iPhone還要便宜。在為期3天的課程中，學員會學到基本的帆船知識、帆的操作技巧、航海術語及規則等，若最後能駕駛單體帆船在水上轉舵、打8字，並下水救出一位扮溺水的學員，便能完成課程。其後可再進修，讀完便擁有帆船的國際駕駛執照，自己做埋船長都掂！值得一提，考帆船牌並無年齡限制，取牌後升讀海外大學更可加分，所以勁多家長幫子女報名。

帆船課程資料

ASA101大型帆船入門

訓練時間︰3天

費　　用︰$3,900/位（兩人開班）

ASA103沿岸航行入門

訓練時間︰3天

費　　用：$5,000/位（兩人開班）

ASA104國際租船資格

訓練時間︰3天2夜

費　　用：$15,000/位（兩人開班）

帆船類型知多啲

帆船大致可分為兩類，大型帆船（Keelboat）平衡度高，船底設有相當重量的灌鉛；小型帆船（Dinghy）則要靠船員的平衡來防止翻船，較考技術和合作性。售價方面，一般帆船由廿多萬起；若經CATA租船，假日租金只需$2,990起（包船員）。而會方見香港人愛開「船P」，今年更引入了身價逾

$300萬的法國帆船遊艇Jeanneau Sun Odyssey 44i，全長13.75米，並提供3間房、私人浴室及煮食爐等，加上可播iPod炸機，猶如私人海上王宮一樣。

單體帆船：Beneteau First 21.7法國單體帆船

特色︰長6.4米，可載3人及1名船員

租金：平日8小時$1,990、假日$2,990

帆船遊艇：Jeanneau Sun Odyssey 44i

法國帆船遊艇

特色︰長13.75米，可載12人及2名船員

租金：平日8小時$5,330、假日$7,990

另類觀光團

除了自己租船外，如想假日輕輕鬆鬆享受帆船樂，也可參加CATA舉辦的觀光團，於7小時裏遊遍萬宜東壩，欣賞地質公園的岩石美景。

地質公園雙體帆船激遊

時間：全程約7小時

人數︰最少10位（最多30位）

費用：每位$395起（星期六、日）

網址︰www.cata.hk