《Driver》賽車系列唔似《Need For Speed》咁年年出新Game，對上一集已經係07年的《Driver Parallel Lines》。遊戲出得唔密無非係想精益求精，以該系列全球逾1,400萬套銷量來看，新作自然備受重視，今集更將遊戲舞台搬到三藩市，可以揸車時用超能力瞬間換車，勁似睇緊一齣科幻賽車片！
撰文：布偉倫
查詢電話：2418 8896
睇遊戲個名都知新作在三藩市取景，當然有齊晒金門大橋、九曲十三街、漁人碼頭等地標，玩家可以穿梭城巿各景點之餘，更可在20個挑戰賽及80個鬥車比賽中兜風，這亦是《Driver》系列一大特點，唔似其他賽車遊戲一嚟就埋牙鬥車，反而強調故事性，講述罪犯Charles Jericho身處三藩市，玩家就扮演警探John Tanner在市內飆車捉賊，等大家猶如置身荷里活電影般刺激。
咁《Driver San Francisco》同玩開兵追賊嘅《Need For Speed》有何不同呢？不同之處當然落在主角身上。話說John Tanner因一次嚴重車禍後，竟然學識一種名為Shift的瞬間換車能力，即係駕駛一架車時，一眨眼就可以轉揸另一部車，玩時空轉移。迅間換車最大好處係能夠擅用不同車輛的優點，在車水馬龍的街頭逢車過車，撞到賊車行唔郁便完成任務；玩家甚至可以轉到對手車輛，逼佢炒車都得，玩法天馬行空。遊戲入面仲有逾100款賽車畀大家揀，特別在除了歐洲名廠戰車外，連60、70年代美國老爺車都有。
電影感係遊戲一大特色，撞車時玻璃四濺甚至翻車，過場時更加入漫畫分鏡設計，還導入了Director模式，讓大家可以扮大導，將之前飛車的驚險場面及甩尾花招進行剪輯。除以單人之力追截賊車，亦唔少得連線玩網上對戰，遊戲設有9個線上模式畀大家玩，仲可以用到Shift換車超能力，不過自問方向感麻麻的玩家，就要花多點時間練習，唔係真係連自己揸緊邊架車都唔知！
類型：賽車
開發：Ubisoft Reflections
平台：Xbox 360、PS3
推出日期：9月1日
售價：$359（Xbox 360）、$388（PS3）