新球季剛開鑼，香港球迷相信又要過通宵睇波的生活，但即使是死忠粉絲，都冇可能追齊晒英超、西甲、德甲等全部賽事，開OT或者約Friend夜蒲隨時會錯過精彩球賽。其實App Store有不少球壇資訊Apps，由新聞、聯賽榜到遊戲等全部有齊，以後實唔怕走雞。
要數港人最愛的球賽，相信肯定係「英超」。《iFooty》集結了各大英格蘭聯賽資料，仲要詳細到連業餘聯賽如Blue Square都有，喜歡「連汁都撈埋」的球迷不容錯過。而且對賽時間、戰果、新聞應有盡有，仲有埋Chats功能畀你聊天。當你選了想關注的聯賽，一開App更會優先列出其資料，相當貼心。
這App提供全球20個不同聯賽的資料，連較冷門的瑞超、蘇超、葡超等球隊都有。最正係支援繁體中文介面，有齊即時比數、聯賽榜、射手榜、助攻榜等資料。用得中文，可能有人會擔心譯名問題，小記睇落都譯得幾正路，車路士起碼唔會譯作「切爾西」，球迷大可放心。
售價免費
《Euro Football Stadium》有別於一般足球資訊App，不會提供球壇新聞，反而主打歐洲各聯賽球場的資料，可以在歐洲地圖上，揀選各地區的球場，點按就可睇到球場的英文、日文名稱，甚至能以衞星圖俯瞰環境，睇到晒球場位置和附近景物。
售價：0.99美元（折約港幣$7.7）
作為球迷，平時除了睇比賽，當然還要留意球壇新聞，這App主要關注歐霸、歐聯及歐洲國家盃，提供豐富的球壇資料。當中的News唔係齋字咁悶，有埋靚相配襯，球迷做功課自然更有心機。另外還有Live Result功能，跟貼球賽結果。
售價免費
「我落場都踢得好過佢！」落Bar睇波難免會聽到這句對白。下次不妨叫佢試吓《First Touch Soccer》。皆因這App以真實控制為賣點，傳球方向、射門方向、力度控制等全部要自己操控，要玩得叻並唔容易。而畫面亦做得幾靚，備有超過250個知名球隊、30個聯賽、7個不同模式畀你揀，耐玩度十足。
售價：0.99美元（折約港幣$7.7）
撰文：李潤康