波神撲水？
NBA球員當初入行搖身一變成為超級富豪，但退休之後卻極速破產的例子，在過往看過很多，現最令人關心的，必定是波神佐敦，在球壇創出一番前無古人的神話，奉AJ之名及版權等令他躋身超級富豪之列，不過發覺波神最近不斷出復刻吸水，旗下Jordan Brand亦新鞋不斷，莫非波神都為錢煩惱？
天價買球隊做老闆
波神MJ使錢豪爽，之前已買下山頭建起猶如王宮的大宅，之後亦花了1.2千萬美元購入Bears Club新別墅；喜歡賭錢亦是人所共知：去年更以天價2.5億美元買下NBA球隊Charlotte Bobcats（夏洛特山貓）當老闆，可惜這兩季球隊成績一般，剛過去球季亦與季後賽擦身而過，門票銷售以及贊助商支持的收入未見理想；早年與妻子離婚時更被分了1.68億美元家產。MJ現主要依賴Nike Jordon Brand 品牌及個人的商業價值賺取收入，他那若細水長流包保用之不竭的水塘，即使真的見底也不會驚奇。
AJ全軍復刻撲水
佐敦財困沒有真憑實據，但如此使錢，又不能出山落場打波再戰江湖，MJ唯一包搵錢的只餘下Air Jordan這個王牌，所以只要你是粉絲就會發現近兩、三年，AJ復刻的次數極不尋常地大量湧出，由以前可能一年一雙突然變成差不多一個月一對，以AJ 23之名焗你買兩對的Countdown Pack、25周年全白色的All White系列（只出了數對就停了的計劃）、豪華靚料靚皮貴價系列Bin 23都不特止，就連最後一招必殺原色再版都出賣。
AJ迷阿達與阿康：「明知係搶錢都心甘命抵。」
甚麼是瘋狂，相信大家都有過學生時代儲錢買波鞋的經驗，阿達與阿康正是飯可以唔食，波鞋唔可以唔買的人。打從學生時代已經迷上AJ的兩位，擁有接近200對AJ收藏，屬神級Collectors，AJ搶錢他們又有何看法？「以前追佐敦係因為佢真係型，慢慢成了習慣每對都買，覺得可一不可再。之後發覺AJ的收藏價值很高，收埋幾年賣出去可能會升價數倍！但近年的搶錢復刻潮係真係有點失望，有很多以為不會再推出的原色竟然再度復刻；咁都算，但為甚麼以今時今日的技術，復刻質素如此參差，愈出得多就愈差，搵錢唔緊要，明知係搶我們都會買，但希望給我們應有的質素，希望年尾AJ XI不會令人失望吧！」聽得出話中有氣，但看他們今天還是AJ不離腳，就知Die Hard心依然。
SPORT GALLERY店長Ar Ring：「AJ大量復刻，撲水仍有價有巿！」
只要是識籃球之人，相信無人不知SPORT GALLERY的老字號，由公牛黃金年代已經開始賣AJ，也可算是香港最齊AJ鞋種的集中營，要了解最真實的AJ吸水巿況，問佢就最合適！有超過十年經驗、見住AJ風光的店長Ar Ring就說：「佐敦吸水是應該的，始終佢係一個傳奇。雖然近年不停地出復刻令到號召力減少，沒有像以前一窩蜂式的搶購，但聰明在復刻雖多，數量卻比以前少，加上內地人近年對AJ的熱情有增無減，香港人玩AJ I~AJ XIII，內地人則愛AJ XIV至今的款式，家家有求；無可否認因為復刻頻繁令炒價升幅有限，但對我們而言這絕不是壞事。MJ係咪好等錢使好容易睇，根據我過往的經驗，每次復刻AJ XI就是代表他有點問題，出最後手段搵錢。」
罕見激炒
AJ大量復刻，但仍無損別注的炒況，AJ XIII RAY ALLEN 2561 3-pointers別注，為Ray Allen打破NBA史上累積射入最多三分球紀錄而推出的全球限量版，上周香港推出，正價$1,199，但eBay網上已經見高開1,499美元，炒價接近10倍，只論成交價亦達700美元。其他鞋款亦有不同程度的炒味，除原版外尤以初期仍採用「Nike Air」Logo而非「Jumpman」Logo的復刻版為甚。AJ不死。
AJ XIII RAY ALLEN別注採用白綠配色，加上鞋舌Ray Allen球員版Logo，全港得十對，搶唔到係正常。
此AJ IV復刻除為白黑紅的元祖「王道」顏色外，更加入新技術Laser鞋面，當年甫推出即炒上幾倍，現eBay炒價約500美元。
去年推出的AJ III DOERNBECHER，現拍賣至三百多美元。
AJ波鞋鐵三角
AJ系列紅起，球技神級的MJ當然居功至偉，但負責電視廣告的Spike Lee及設計鞋款的AJ之父Tinker Hastfield，才是背後的最大功臣。可以說若沒有這鐵三角的化學作用，AJ球鞋系列絕對不會有如此成就。
Michael Jordan的騰空力與球鞋系列名稱Air Jordan不謀而合。
Spike Lee早期有在Air Jordan廣告中粉墨登場，形象搞笑。
Tinker Hatfield負責設計AJ III至AJ XV、AJ XX、AJ XXIII及AJ 2010，稱為AJ之父絕不為過。
撲水佐證
雖然賣鞋已賺唔少，但錢邊個會嫌多？波神一於撈過界上埋NBA家用機遊戲封面，仲不斷出席公開場合，令Fans唔會忘記自己之餘，仲可以自我宣傳一番。
除了九十年代初曾以個人名義推出PC Game外，MJ不曾於遊戲中出現，但今次竟連續兩年擔任《NBA 2K》系列遊戲封面代言人，一定好等錢使啦。
球會的暑期活動Bobcats Fantasy Camp，老闆佐敦大可以致辭講兩句拍拍籮柚走，不過佢就親力親為教小朋友打波，仲以48歲高齡表演入樽，夠晒話題性！
愛好高爾夫球的波神參與上月舉行的Tahoe Celebrity Golf名人高球賽，增加曝光率！
公牛三連霸20周年都可以搞慶祝，佐敦身為當年MVP當然要出席！其他球員包括柏賓、學治、格蘭等。
撰文、部分攝影：陳捷偉