利蘊珍運動燃鬥心踩住上
無綫董事利孝和夫人女兒利蘊珍出身名門，卻沒有千金小姐嬌生慣養的姿態，教育子女不會假手於人，家中從不需要工人；去旅行以睡袋作床、睡沙漠、七日沒洗澡；成立運動慈善基金，她以身作則，以踩單車形式穿越絲綢之路籌款，是非一般的名媛。
名門千金利蘊珍（Marie-Christine Lee）一向低調，除了間中為配合場合而「扮嘢」之外，都不會做傳媒訪問，怕被人指show off、博見報，但因為成立「運動燃希望基金」，希望能籌得更多善款，而四出宣傳，同時亦令大家更了解她，Marie說：「我唔係anything，亦最怕被人話我係邊個，但依家最重要係我可以做到幾多嘢，我希望可以帶到正面訊息畀大家。」Marie與夫婿雷禮權於17年前成立教育基金，默默地培育了不少人才，成功率有99%，何謂成功？就是栽培一個有用、懂得回饋社會的人，Marie開心地說：「我哋培訓咗44個學生，佢哋依家個個都可獨當一面，回饋社會，我哋希望呢個精神可以一直咁傳落去。」
全面培訓貧窮學生
Marie今次成立「運動燃希望基金」，主要幫助香港貧窮學生，不希望因為窮困而埋沒他們的運動細胞。Marie是一位運動健將，任何運動都難不倒她，提起這基金，她即滔滔不絕地說：「想鼓勵啲人做多啲運動，香港小朋友習慣喺冷氣地方，運動好缺乏，如果啲人做多啲戶外運動，就算通街玩，對健康都係有益。做運動可令思維更清晰，諗嘢亦好正面，訓練人嘅決心，因為冇恒心，有少少辛苦，就會搵藉口放棄，就好容易半途而廢，我自己喺運動上得益好多，成長得好好。」
Marie透露基金預計在明年初運作，並不是只有小部分人可參加，她謂會將訊息發放全港的學校，再經篩選，獲資助的學生會作100%全面的培訓，不僅是訓練學生運動，而且在食物營養、受傷處理、物理治療，甚至要到外國深造，都會提供，她說：「我唔係要佢做奧運選手，就算做運動醫療人員都可以，只要對社會有貢獻。」而Marie自己亦身體力行，將於下月十六日出發，以踩單車形式穿越絲綢之路來為基金籌款。
屋企從來唔用工人
Marie可謂全能女性，無論家庭或工作都可全面兼顧，照顧子女更是親力親為。Marie說：「我屋企從來都唔用工人，就算一對小朋友都係我照顧佢哋起居飲食、讀書補習都由我包辦，所以佢哋好細個已學識獨立。個仔五歲帶佢去滑雪，已要佢自己穿滑雪衣，我唔會幫佢，就算喊足一個鐘，我都唔會出手，因為我細個時媽咪都係咁教我。」雖然管教嚴格，但與子女卻沒有隔膜，她說：「我哋會以朋友形式去溝通，所以佢哋有乜事都會同我講，而且我哋每年都會全家去旅行。」
全家人齊齊瞓睡袋
Marie曾講過她去過沙漠旅行，睡沙漠、七日沒有沖涼，這經歷並不是她一個的，而是全家一齊去，她說：「嗰時我個仔八歲、個女六歲，我哋去咗七日，喺沙漠瞓咗六日，去到邊瞓到邊，四周無物，夜晚開睡袋瞓，冇得沖涼，日頭三十幾度，夜晚結冰，天氣變化好大，而且要自己整嘢食，一條麵包食七日，有沙都照食，個旅程都幾辛苦，不過係好難得嘅經歷，一對小朋友當時雖然覺得好辛苦，但佢哋好堅強，我相信呢個旅程，佢哋永世難忘。」
籌逾千萬善款
Marie為運動基金踩單車籌款，她豪氣表示希望可籌到過一千萬，在短短的幾個月，得不少朋友慷慨解囊，款項已達目標，Marie說：「今次好多朋友都好支持，不過就算籌唔到呢個數，我都會包底。」Marie籌備今次活動，好友李桂蘭出了不少力，李桂蘭說：「我同Marie識咗好多年，當我知道佢有呢個計劃，我好支持，覺得好有意義，所以一定會為佢出一分力。」
三日穿越絲路
點解會選擇以踩單車穿越絲路？Marie表示她的意大利朋友Andrea Oschetti一早已計劃由伊朗踩單車到新疆喀什，預計需時七個星期，作慈善籌款，她續說：「Andrea所籌得款項會捐畀我嘅運動基金，我亦希望可以出一分力，所以連同前香港三項鐵人奧運代表李致和、及只有十六歲的女鐵人陳樂怡join埋Andrea，我哋喺中國邊境出發，踩到新疆喀什，預計會用三日時間，而我哋踩嘅路係以前無人踩過。」
採訪：林麗玉
攝影：劉智源