黃易群俠傳2 時空飛車打惡龍
提起《尋秦記》，大家可能會想起電視劇中的古天樂（項少龍）和林峯（嬴政），今次佢哋再出擊，不過唔係拍電視劇續集，而係集黃易眾多武俠小說於一身的《黃易群俠傳2 Online》，項少龍將會穿越時空，騎電單車打恐龍。近日仲大搞發布會，搵來黃宗澤（Bosco）扮《覆雨翻雲》主角浪翻雲，高海寧今次就唔玩泥漿，改扮性感女道士。
電單車穿越時空
5年前出《黃易群俠傳Online》第1集，港台都大受歡迎，新作再於黃易武俠小說搵靈感，除扯頭纜《尋秦記》主角項少龍外，還有《覆雨翻雲》的浪翻雲同龐斑等，再次用上時空大反轉橋段，將《尋秦記》、《覆雨翻雲》、《大唐雙龍傳》幾個唔同年代的故事串聯。遊戲Trailer更是主角騎住電單車逃避恐龍追截，場景仲有太空基地，完全唔需要搞清遊戲年代背景！另外，兩位嘉賓中，原來Bosco以前拍劇做過浪翻雲徒弟韓柏，今次就「升呢」Cosplay師傅，造型都似模似樣。
多元化職業架構
當年《黃易群俠傳》勁威水，在台灣做出19萬人同時在線紀錄，之後同廠的《中華英雄Online》同《天子傳奇Online》再分別創出23萬人及36萬人在線紀錄，難怪廠方對新作寄予厚望。新作的故事同第一集一樣，都是科幻式冒險為主，除會出現之前講過的遠古恐龍外，仲有時光機同各式機械出場。今集另一賣點是引入更多元化的職業架構，除6大基本職業外，亦設有12種唔同的二轉職業，兼且可配合兩大武學天賦同15種武器，組合出與眾不同的角色並唔難。
6大屬性自由配點
Bosco在試玩時就揀武士，貪佢埋身戰鬥能力強，而高海寧的女道士就專長補血，可用雷、闇兩種屬性攻擊；至於另外4大職業分別係擅長用魔法的幻魔、擅長製裝備的工匠、能令敵人失明和緩速的刺客、以及遠程攻擊的射手。遊戲亦強調自由配點玩法，在50級以前可自由地從力量、敏捷、體魄、精神、膽識同運氣6種屬性中配置點數，可以邊打怪邊試哪種屬性最適合自己。遊戲玩法雖然離唔開打怪升級，但系統方面卻經過改良，如加入24人大型副本，可蒐集怪物卡片、時空地圖、聲望經營、成就魔輪等提升趣味，仲支援3D畫面添！
類 型：MMORPG
開 發：中華網龍
平 台：PC
封測日期：即日起至7月26日
公測日期：8月5日
網 址：http://hk.chinesegamer.net/he2/
撰文：布偉倫 部分攝影：謝孝祥