跳出模界 由零開始 蔣怡闖出一片天
名模蔣怡（Coco）毅然棄模從影，拋棄所有走到台灣由零開始。經歷四年打滾，榮升為著名主持及藝人後，強勢回歸香港！率性隨心的她，做事不會顧慮後果，全因有拍拖十年的男友翁狄森在背後全力支持。歷經風雨，始終情不變，成功女人就是需要這樣的後台。
每逢提起Coco，大家很自然就會給她冠以「名模」的稱號。即使獲得所有人的認同，她亦從未因而感到滿足，甚至早已厭倦這毫無驚喜的生活，可謂無心戀戰。「喺香港做咗模特兒四年，其實一直都唔係幾enjoy。做模特兒比較悶，淨係要擺pose，完全唔使表達你嘅情緒。而且我太熟呢一行嘅嘢，覺得冇新嘢學，又冇得再突破、再上位。接job嘅時候，簡直係連期待都冇！」單調乏味的生活，令她下定決心脫離模界，更堅拒再接相關工作。「不過真係好難。我quit咗modelling半年，人哋搵我都只係會畀模特兒job我。大家都只係會覺得我係model，喺嗰時我就覺得一定要去另一個地方從頭開始！」
由金馬獎主持開始
大家必定很好奇，Coco怎麼可能那麼灑脫，放棄一切名利，到一個全新的地域從頭開始？「我好追求新鮮感，做嘢都係憑直覺、想做就做。其實我唔係大膽，而係頭腦簡單，唔會去諗太多後果。」受幸運之神眷顧的她，心裏想到哪裏發展，機會就從天上掉到她面前。「公司有一日突然打畀我，問我有冇興趣做金馬獎主持。而且仲要係過兩日就要飛去開記招，一切嚟得好快。對於我嚟講係一個好大嘅挑戰！喺短短十幾日裏面，我要睇晒一本字典咁厚嘅資料，同埋十幾部電影嘅DVD！我就一直匿埋喺房，埋頭苦幹。」努力當然沒有白費，金馬獎順利完成，而Coco亦大獲好評，迅速被招攬為娛樂節目主持。
搖身一變成為主持的Coco，於娛樂及時裝節目中談笑風生，恍如一個小博士、一本百科全書！其實她在鏡頭背後所下的苦功，實在超出常人所能想像。「其實我每一次錄影嘅前一晚，我都冇得瞓，因為要通宵睇晒第二日要訪問嘅藝人嘅資料。如果唔了解佢哋嘅背景，好難問到好問題。加上一次過其實係錄五個或者三個藝人，有時仲要係組合！我就要睇晒咁多個人嘅資料，壓力真係好大！曾經試過收視下降，我喊住咁話唔想做！」堅強的Coco當然不會輕易被打垮，更把壓力化為鞭策自已的動力，全力以赴，珍惜每一個學習機會。最終得到大家的肯定，更踩過旅遊及飲食界，實行寓工作於娛樂！
演舞台劇有滿足感
出任旅遊節目主持，能體驗各地的風土人情、擴闊視野，Coco固然開心。但最能令她醉心的工作，始終都是演戲。提到早前參演的舞台劇《潮性辦公室》，她即滔滔不絕地細說難忘點滴。「我哋排練嗰陣係冇劇本o架！我哋每日就諗一啲喺辦公室嘅搞笑、鹹濕嘢，自己設計自己嘅角色，每日返去就好似同人哋玩咁！最後將所有精華編成劇本，所以每一字一句都係我哋自己諗架！自己有份參與創作，見到人哋笑嗰陣，個滿足感真係好大！好好玩！」
縱然在工作上得到極大的滿足感，但作為一個女性，感情生活必然是人生中最不可或缺的部分。眾所周知Coco有一個拍拖十年的設計師男友翁狄森，她於台灣發展期間，兩人分手之說更是傳得甚囂塵上！對於種種流言蜚語，Coco都一笑置之。「其實我哋都冇分開過，我哋互相都好有信心。其實我去台灣發展，真係好多得男友支持。雖然佢好想我返嚟香港，但係把口就會同我講『努力呀！』，鼓勵我繼續做自己鍾意嘅嘢。其實我想返香港都係因為掛住佢，但係得到佢嘅支持，又令我有動力繼續留喺嗰度！」她更透露在台灣工作期間，無論多累、工作多繁重，他們每晚定必互通電話，更坦言那一、兩小時的溝通時間很重要！看到她甜絲絲的笑容，我們不難明白到何謂「每個成功女人背後都有個男人」。
動物保育
喜歡大自然的Coco，常跟男友到非洲、印度、新西蘭、澳洲等地探險，當中亞馬遜河之旅最令她印象深刻。「我哋抱住鱷魚影相、跳入有食人魚嘅湖裏面同海豚游水。又喺叢林度瞓覺，自己起火燒嘢食、喺河度洗手，所有嘢都好原始！」
Coco慨嘆人類不斷影響生態環境，令無數生物面臨絕種的危機，故希望於退休後能深居簡出，並做一些有關動物保育的工作。「世界上有好多動物需要幫助、需要人愛錫。我屋企都養咗六隻貓同兩隻狗，我當正佢哋仔女一樣！」
不時不食
愛吃的Coco，原來是美女廚神。「我得閒無事就會煮吓嘢食，特別係甜品！我好鍾意試煮新嘢，不過每樣嘢成功咁煮咗一次，我就會去試煮其他嘢。但係我男友成日都要求食啲唔合時宜嘅食物，好似喺冬天，佢會要求食士多啤梨雪芭。我係唔會理佢架！我嘅宗旨係不時不煮！」Coco對飲食的執着，最近獲DBS信用卡誠邀她出任Dining Planner分享美食經驗，並親身上陣盛裝拍廣告！
採訪：龔凱欣
攝影：黃叔榮