Volkswagen Touran GT清靜暢遊馬鞍山

假日揸車到郊外玩，最怕就係人多兼冇車位，唔想放假都要晨早起身霸燒烤爐，不如揀啲冇咁熱門嘅地方。好似馬鞍山郊野公園咁，嗰度有齊BBQ場地、家樂徑及健身設備，但遊人不多，若非遇上大時大節，全年大部分日子都冇乜人同你爭位，想遠離繁囂，下次出動識揀地方啦！

售價：$288,800

170匹馬力合家歡

郊遊燒烤好多時都係成班人一齊玩，七人車這時便大派用場。如果嫌2公升MPV牌費貴，可以考慮Volkswagen的Touran GT，其1.4 TSI引擎導入了「孖叉」（Supercharger+Turbo引擎）技術，除了油耗可低至6.6L/100km外，馬力更達到170ps，力水比大部分2公升MPV都要強。再者，Touran GT所搭載的DSG波箱更用上七前速設計，提供了更平順的乘坐感，更有利於節省油耗。儘管Touran的設計不是讓你以「波波盡」的駕駛方式去劈彎，在山路快走一段，紮實的車架卻提供了精準、穩定的拐彎表現，完全不似在操控着一部1.674米高的MPV。稍為用力關上車門，一下低沉的聲音便會告訴你，德國車的鋼水有多好。

安全兒童鎖至安心

Touran的體積比Sharan細，車身長闊度為4.397米×1.794米，但勝在內櫳布局靈活多變，空間可得到更充分利用。由於中排3張座椅可獨立向前摺合或拆走，車尾的最大載物空間可達1,913L。不少人都視MPV為Family Car，要確保家人安全，除了小心駕駛外，還要防止「百厭仔」搞破壞，試想行車途中有小朋友玩弄門把有幾危險？為此，廠方為Touran加入了「兒童鎖」，駕駛者可利用中央鎖將兩側後門鎖上，即使乘客拉起門把也無法開啟車門，不似得大部分汽車「鎖外」不「鎖內」的設計。現在，只要一個掣便可將車門及車窗完全鎖上，雖不是甚麼高科技發明，卻相當中用。

燒烤場面積頗大，但人煙稀少。	平時少做運動，不妨在這裏玩個夠。	家樂徑沿途置有植物介紹牌，富教育意義。
園內設有石春路，據說可加速新陳代謝。

補胎工具郊遊無憂

Touran GT現時以$288,800開賣，車價與日本車愈拉愈近，而且設備齊全，雙區域恒溫冷氣、定速巡航以至巨型天幕都是標準配置，計落其實幾抵買。不講不知，原來車尾地台底預置了補胎及充氣工具，遇上輪胎漏氣也毋須「唧」起部車換胎，只需幾個簡單工序便可為輪胎打氣，嬌小女士都可應付自如。總括來說，不計性能、不計設備，只是每年慳到的牌費及油錢，Touran GT都有足夠說服力，叫日本車Fans轉用歐洲MPV。

軚環後方設有加減波按鍵，增添不少駕駛趣味。	中排以3張獨立座椅設計，而且可整排拆走。	天幕面積非常巨大，把大自然融入車廂。
尾箱容積最大可擴展至1,913L，載物量驚人。	TSI引擎好力低油耗，細容積已可輸出強大馬力。