虎背熊腰的大隻佬A近期好沉靜，也許工作太忙吧。數天前終於相約飯敍，OMG，兩耳包紮着厚厚紗布，像一頭科學怪人，怎麼了？把兩部iPhone 4都縫上去，終生免提通話了嗎？A自爆：「我做咗手術……」開幾刀、縫幾針，把兜風耳改到不太兜風。
他解釋：「細細個就成日畀人笑係『怪物小王子』，就一直想不再兜風，依家願望就快達成啦！」也許我一向喜歡藤子不二雄的漫畫，所以覺得「怪物小王子」好OK好得意喎。坐在他身旁的死黨B剛剛相反，耳朵貼腦，我笑問他會否改為少少兜風？他斬釘截鐵：「我先至冇咁無聊！」回想起來，很多人成長時，總被嘲笑這些恥笑那些，一旦長大了，立即勁減肥、學打扮、買靚衫、甚至改名字，就是為了擺脫那些不快的回憶。當然，又或者，純屬貪靚。
A說不在乎別人指三道四，然後帶點孩子氣問我：「其實我都唔算係整容啩？我冇放嘢入身體喎！唔係隆胸喎！」我說：「唔係整容都係整形啦！耳朵形狀都變咗！」你整到像隻小飛象，我保證都跟你吃飯耶。
有說兜風耳反叛、硬頸、家庭緣薄，但熱情開朗，很受朋友歡迎，還白手興家懂得賺錢；耳朵貼腦則較為沉默寡言性格內斂，但出身富貴。看着A和B，發覺所言甚是。A有所不知的，是他兩人走在一起時，一個似技安，一個像叮噹，依然難逃藤子不二雄筆下的宿命。呵呵。
旅遊飲食寫作人