5mm幼框D8000三招至Smart

近期電視大廠輪流出招，這星期到Samsung在新款3D Smart TV，玩盡三大Smart招，玩型、玩款兼玩娛樂資訊。當中2011年旗艦機款D8000擁有5mm極幼邊框外，更強化3D影像效能，由外至內觀感都殺晒，仲可玩Smart Hub內的多種娛樂及資訊功能，分分鐘玩到唔捨得上床瞓！

售價： $47,980（55吋） $58,980（60吋）

第一招：One Design極幼邊框

Samsung的設計功力毋庸置疑，但要將電視「去邊化」確實唔易，今次D8000就利用全新One Design概念打造出5mm幼框，須知道就算是手提電腦，顯示屏邊框最幼紀錄都要7.7mm，而Samsung卻能在60吋畫面將邊框造到5mm，相比之下更顯誇張，邊框還蓋上金屬片，燈光照射下倍覺耀眼。此外，D8000還將功能鍵隱藏於機側，輕觸按鍵時，電視畫面便會顯示出相應功能，按鍵設計都有型過人。

5mm邊框實在太幼，連Logo都擺唔落，要略為加闊。

D8000擴充性充足，備有4組HDMI端子。

功能按鍵隱藏在機側，一按即會在屏幕上顯示介面。

第二招：Smart Hub 玩盡娛樂資訊

Smart Hub是Smart TV的重點項目，其實某程度大家可以將它理解成升級版Internet TV，由介面、內容以至操控方法都所突破。當中齊集了Social TV、Web Browser、Search All、Your Video以及Samsung Apps，可在畫面左上方收看電視時，在其他區域同時玩facebook、上網搵資料、收睇電影預告片或瀏覽網頁，仲可以好似平板電腦般下載Apps玩，有齊遊戲、資訊同娛樂等內容。最正還可以為GALAXY S或GALAXY Tab裝上遙控App，控制Smart Hub各項功能，非常好玩！

只要裝上遙控App，用手機都可以玩Smart Hub。

在GALAXY Tab裝App後，即可將Tablet變身做遙控器。

Smart Hub介面有型，左上角畫面更可睇埋電視。

第三招：眼鏡無線充電

Samsung還為主動快門式3D眼鏡轉用新設計，主打型號SSG-3700CR改用較輕物料，令重量減至28g外，眼鏡臂亦採用彈性設計，就算套在另一副眼鏡上都貼面舒適。始終主動快門式3D眼鏡需充電使用，為此廠方今年出埋無線充電器，一次過可為4副眼鏡同時充電。此外，D8000的3D顯示技術再度改良，除應用Micro Dimming技術提升對比度，亦使用800Hz CMR流暢倍增技術，大大減低殘影問題，現場測試時，3D畫面完全唔覺閃爍，細緻度及對比度出色，亮度亦跟2D畫面接近，比去年又再進步。