原粒黑松露刨片做湯底

選用意大利Alba黑松露

黑松露有幾矜貴？一顆拳頭般Size、約300克重便價值過萬元。對，它就是這樣昂貴，但任何菜式，只需簡單刨上幾片，平凡意粉、薄餅都即時「升呢」，搖身一變成為Hot Items，不過平常只見於西餐之中。位於尖沙咀山林道的「豪門火鍋 日式刺身專門店」就選用意大利北部著名產區Alba的新鮮原粒黑松露，首創將其刨片做湯底，加入姬松茸、冬菇、靈芝菇等熬4小時，然後到客人打邊爐時才加入8片黑松露，濃郁的菌香隨即撲鼻而來，單是聞到已經口水流。大廚更將黑松露製成帶子雲吞、豬肉丸等，質感爽嫩彈牙，能試勻黑松露不同的口感，別具風味。

三筋鍋啱女士美顏

矜貴的黑松露是主打，其他湯底款式及配料都一樣咁講究，前者共廿款選擇，全部都用足料靚貨，如女士至愛的骨膠原美顏三筋鍋，用上牛筋、豬筋、鹿筋等熬成，湯底的膠質極之豐富，有助補充肌膚水分；配料方面牛肉最耍家，包括本地手切肥牛、日本和牛、牛胸爽肉等，更以西式High Tea架放上牛仔粒、牛舌芯及牛頸脊，賣相精緻又夠特別，餐廳更有爽脆的烏魚扣、用花雕浸過的豬腦、炸三文魚皮等火鍋配料，啱晒嘴刁的食客。此外，店子更自設大大個魚缸，每天供應時令的鮮魚即叫即劏，更有日式師傅主理刺身吧，如花竹蝦、加拿大特級海膽等，打邊爐前吃上一兩款，令這晚宴更圓滿。

（左）黑松露豬肉丸 $98、（右）黑松露帶子雲吞 $108 推介極鮮味的雲吞，帶子的鮮甜和嫩滑與黑松露的爽脆很夾！	骨膠原美顏三筋鍋 $168 用上大量花膠、藥材及豬筋、牛筋、鹿筋熬幾個鐘，湯底膠質極豐富，女士想養顏必試。	炸三文魚皮 $48 平時魚皮吃得多，用三文魚炸成魚皮夠特別，脆卜卜很有咬口。
墨魚滑 $78 全部新鮮手打的墨魚滑超彈牙，打邊爐不二之選。	烏魚扣 $68 每條魚只得一個烏魚扣，夠晒刁鑽的配料，口感極爽脆。	牛精品 $388 賣相極精緻的High Tea牛肉，分別有牛仔粒、牛舌芯及牛頸脊，爽滑鮮集一身。
花雕豬腦 $40 用花雕及杞子醃製的豬腦，沒有半點腥味，入口鬆化。	紅菜頭或青菜汁 $68/半打 紅菜頭汁有助降血脂，而青菜汁則加有苦瓜、西芹等，用試管盛載，很盞鬼！

撰文：陳恩怡

攝影：譚建章

查詢電話：2730 1118