謠傳止於智者，謠言止於記者會，Apple終於在3月2日舉行Press Conference，由Steve Jobs隆重宣布推出iPad 2，並於3月11日在美國發售。香港呢？不知道（至少執筆時未知道），只知iPad第一代立即無人問津，本港Apple公司的Q2生意肯定凍過水。
iPad 2比舊一代iPad出色之處，在於有雙核心，令上網打機睇片特別暢順，還置有前後鏡頭，卻依然保持10小時連續使用時間，以及作為旅人，我覺得好重要的──「身材」比第一代「纖瘦」三分一、「體重」輕盈15%，四處攜帶變得愈來愈方便。對於大半生致力成為型人、潮人的朋友，iPad 2的「醒目套」Smart Cover完全合乎合尺，這塊像「皮」多過「套」的小薄片，有齊粉紅粉藍粉綠和真皮選擇，還可摺來摺去，到Cafe開工變得愈來愈時尚。
身邊的友人均受iPad影響。有人第一時間撲貨，像買新季度春裝，只在乎「新」多於「用」；有人於1月已將第一代iPad高價放出，一邊靜心等待第二代，一邊以「山寨版」填補真空期；也有人在兩星期前打死不聽謠傳，堅持要買iPad第一代送給哥哥做生日禮物──如果你是他的哥哥，會不會暗中放貨，或賣給內地同胞？
可以料到，3月12日開始，本港四處將出現「晒命族」，那群買iPad 2的水貨人士，勢必在地鐵車廂、各大咖啡室、多個當眼公眾地方，以最不可一世的表情和姿態使用iPad 2來上網、打機、上YouTube、睇爛片……iPad 2 is fun, and so is 晒命。
旅遊飲食寫作人