邱李茂琪點止Chanel迷咁簡單
不少人都一定會以為名媛錢多多，買衫只會全套名牌着上身，買到靚衫可是卻買不到品味，不過靚太邱李茂琪（Margaret）就打破這個定律，曾獲頒傑出衣着獎項的她，衣着品味毋庸置疑。身為Chanel粉絲的Margaret，不但穿出原着神髓，更擅於大玩Mix & Match，盡顯個人品味與個性。
幾時開始鍾意時裝？
係我生完第二個小朋友之後。我中學時已經喺學校攞Best dress，嗰時我只係着自己鍾意嘅衫，但仲未係咁熱衷，我有啲同學直情係一摸件衫就知道係咩質料，好有天分，我未去到呢個境界。到我生完第一個BB之後，因為要返工，着嘅都係套裝多，未係太花巧。到生完第二個之後，啲人開始同我講話「咦，唔似喎，你都唔似生完兩個嘅。」我聽完覺得好大壓力，同埋我老公個樣又十年如一日，自己就生完兩個，唔可以唔Keep住最佳狀態。我覺得Fashion可以提升自信，令人開心，聽到啲人話我「好靚呀，你邊似生完兩件」都會好開心。我都會幫對仔女，仲有我爹哋扮靚襯衫，有時囝囝囡囡會自己襯完再嚟問我意見。我囝囝Julian以前好怕醜，依家人哋讚佢着得好靚仔好Smart，佢會好開心，自信咗好多。
古老當時興
點解咁鍾意Chanel？幾時開始鍾意？
個個都話我着得好睇，佢啲嘢可以Mix & Match、唔分Season、好Classic、好襟興，唔會一睇就知「咦，呢件咪上年出嗰件咩咩囉」，唔會一睇就知過咗季。佢今個春夏出咗好多短褲，用佢Signature嘅Tweed料，好靚好易襯。
我好耐之前已經鍾意呢個Brand，我諗每個女仔都鍾意，不過以前我冇買咁多，佢啲嘢就算舊咗我都唔會嫌棄，其實唔係舊，係Vintage，特別呢兩年好興Vintage嘅名牌。
覺得自己貪唔貪靚？
我諗個個人都貪靚，只係程度唔同。我唔會襯衫襯大半日先出到街，我襯衫超快，因為我沖涼時已經諗好要着咩同點襯，化妝我就當畫畫。
我都會畀意見啲朋友，見到佢哋着得唔對路又或者係個妝有問題，我會同佢哋講，好嘅又會讚佢哋，有讚有彈，我身邊啲朋友都靚咗。
拒爭先恐後
覺得自己係唔係一個時裝精？
唔係，我唔會為咗趕潮流，為咗快人一步，冬天都着夏天衫，又或者大熱天時都包到上頸，唔會唔啱天氣都要着先過人。
我唔會瘋狂購物，有自制能力，唔會重複買啲差唔多款嘅嘢。依家唔係咁多Event，唔會買咁多Evening dress，不過一定會買定兩、三條喺度，因為老公會突然同我講話今晚Black tie，咁我都有兩手準備。
我最鍾意買手袋，由細細個開始已經好鍾意，中學時成日都捉我細佬陪我睇手袋，因為返學多數都係着Jeans，打扮唔會太花巧，手袋就可以突出個性。
要隱惡揚善
覺得品味係咩？點樣可以提升品味？
要知道自己嘅Style，唔好見到嗰個人好出名或者着嘅衫好靚，就跟人哋咁樣打扮，唔可以盲目跟隨，要知道自己嘅長處同短處，我嘅穿衣之道係盡量表現長處，掩飾短處，唔一定要成身名牌，可以Mix & Match。
點樣可以培養潮流觸覺？
係Sense嚟，如果覺得自己唔夠Sense，可以睇多啲時裝書同埋觀察多啲。
最愛老佛爺
潮人嘅定義係咩？
着出自己嘅Style，凸顯到自己嘅個性。當然都要知道個Fashion trend，今個春夏就好興短褲、鬆糕鞋、頭箍同大袋。Accessories好緊要，我好鍾意買Accessories，好似絲襪、帽同頭箍，同一套衫，加咗Accessories後成個Look可以好唔同，好突出。
最欣賞邊個時裝設計師？
Karl Lagerfeld（老佛爺），佢每次Fashion show嘅嘢都有新鮮感，啲設計唔會重複、又唔會太誇張、好Classic好襟興，係我嘅Style。
熱愛配飾
Margaret對Accessories的熱愛絕不下於時裝，她說：「我好鍾意買，最鍾意去日本買，因為好多款式好多選擇，可以營造唔同嘅Style。」而Chanel的Bangle亦是她的至愛之一，不過因為手腕纖幼，Bangle經常會掉下，Margaret便以絲帶繫緊，實用之餘亦盡顯心思，更見個人風格與品味。
醉心繪畫
邱李茂琪丈夫邱子傑為楊受成外甥，亦是溥儀眼鏡老闆兼歐洲坊CEO，兩人育有一子一女。留學美國Washington University Fine Art的Margaret從小已醉心繪畫，年前曾先後在維也納以及佛羅倫斯舉行畫展，對美學藝術極有研究。
修補古董屏風
Margaret向來追求品味生活，對家中的擺設十分講究，且全都由她一手包辦，在大廳中有一個購自巴黎的古董屏風，以絲綢製成，上有一朵朵小白花，精緻非常，令一室更添高雅氣息。原來這個屏風曾給Margaret親手界破，而小白花是由她一朵朵貼上用以遮掩裂縫，她說：「個屏風運到嚟我屋企時，我好興奮，即刻好開心咁用界刀界開啲紙，但我唔知入面嗰層Bubble保護膠係咁薄，結果個屏風畀我一界界爛晒，我唔開心咗兩日，之後諗到可以貼番啲花上去，好彩最後成功補救到。」
採訪：張嘉敏
攝影：鄭家俊