鄭兆良擴大版圖為華人爭光
香港著名時裝設計師鄭兆良（Barney）由造成衣到只專注造高級訂造服，全因對設計與品質的一份堅持，自言以前懶懶閒的他，決定今年開始要更加積極，與其他品牌crossover以及主理巴黎一間酒店的服裝等，大計多籮籮，繼續把本地的設計發揚光大，在國際時裝舞台上為華人爭光。
記：記者 鄭：鄭兆良
記：喺香港造時裝有咩特別困難之處？
鄭：最難就係要用最便宜嘅造法造出最高質素嘅嘢。好似一件鱷魚皮褸，啲國際品牌要成六十萬一件，但我同樣用南非鱷魚皮，同樣喺日本染色，十萬以內就有一件，我唔需要賣廣告，唔使請明星，成本自然差好遠。
設計揚威奧斯卡
記：決定放棄造成衣，選擇只造度身訂造時有無掙扎過？
鄭：有。嚟度身訂造嘅客人唔鍾意你講出去，自己又唔係點宣傳。當年楊紫瓊着我設計嘅晚裝去奧斯卡頒獎禮，原本冇諗住講畀人知佢當日會着我嘅設計，後來係啲媒體問啲星會着咩衫出席，我至講佢會着我嘅設計，最後仲入選咗美國嗰年嘅十大best dress，而我係唯一一個冇大財團back up嘅設計師。
以前仲係造成衣時，有個客去美國結婚搵我過去幫佢造衫，我喺嗰邊行舖頭時見到我啲衫，但點解啲手工咁差嘅？原來佢哋搵人抄我啲設計嚟造，我覺得好唔尊重我嘅設計。造成衣嘅滿足感係賣得好，不過收錢收得好唔順暢，度身訂造就會同啲客人好似朋友咁，佢哋好支持我。
記：咁多年嚟有冇遇過逆境？
鄭：兩年前嘅金融海嘯，生意靜咗好多，好擔心唔知會唔會過唔到嗰段時間。但啲客人好錫我，有客人訂造首飾，一訂訂幾件，又有客人訂造皮褸，幾個一齊訂，十幾萬一件，訂幾件已經幾十萬，對我非常support。
記：有冇諗過放棄？
鄭：又冇喎，有辛苦先會開心，依家工作過程會係享受多咗。以前參展係想話畀人知香港可以造到國際級嘅嘢，依家人哋已經知道，反而想騷多啲love of nature。
記：創作同商業有冇conflict？
鄭：最成功最頂尖嘅設計師係設計、管理同埋生產比例形成一個三角形，自己唔可以一個做晒，我依家唔會好似以前咁，做咩都話一定要點要點，時間到就會形成呢個三角形，到時候就可以做個真正全中國都識嘅品牌。我希望物色到一個同我夾得到嘅manager，一齊開拓中國市場。
與巴黎酒店合作
記：覺得香港人着衫有冇自己style？
鄭：香港人其實好叻將最新嘅嘢擺喺身上，有無窮嘅追求，唔會好似我咁懶懶閒。由依家開始我要積極啲，今次做番TDC個騷都好開心，嚟緊我會同唔同嘅品牌合作，2015年會同巴黎一間酒店設計佢哋所有嘅制服。
記：點先可以做一個潮人？
鄭：着啲普羅大眾唔會着，唔會見到嘅嘢。我以前去巴黎買布，當地人唔畀我買，因為佢哋覺得中國人淨係識得抄襲，依家已經唔同晒，仲好歡迎，依家做亞洲設計師比以前好好多。
記：如果唔做設計師會做咩？
鄭：我諗我會做攝影師，總之我做嘅嘢一定要同靚嘢有關。我六、七歲已經立志要做時裝設計師，要做裁縫，因為細個同媽咪去飲時，見到個個都着得好靚，個個都好開心，我想造啲靚衫出嚟，等啲人成日都可以咁靚咁開心。
千億新抱都愛穿
Barney畢業於加拿大滑鐵盧大學，取得藝術學士學位，他亦曾於倫敦皇家藝術學院攻讀紡織設計，以及於巴黎帕爾森設計學院攻讀歐洲服裝史。1993年，他參加香港貿易發展局主辦的青年設計師大賽，憑Diva Bride系列奪得針織類別的最佳設計大獎。同年八月，他在香港成立了自己的工作室Yenrabi Ltd，至今一直擔任設計總監，為旗下自家品牌設計高級訂造服。Barney曾為不少名人影星設計服飾，張曼玉、鞏俐、舒淇、楊紫瓊以及千億新抱徐子淇都愛穿他的設計。
親力親為零架子
Barney貴為國際級時裝設計師，卻一點架子都沒有，訪問當日剛好在拍攝他最新系列的時裝專輯，Barney由揀衫到配襯首飾都親力親為，又親自為model顧婭棋整理晚裝，即使蹲在地上亦毫不介意，只為出來的效果能盡善盡美。
文：張嘉敏
攝：司徒國榮