LUMIX Phone篤芒對焦扮GF2

近日Panasonic GF2再度掀起篤芒拍攝熱潮，而向來愛玩相的日本手機界亦終於出手，引入首部以LUMIX Phone掛帥的docomo P-03C。驟眼看，機背與一般LUMIX相機無異，玩上手更似足GF2，無論篤芒對焦、iA智能模式、高清拍片全部有齊，配合1,320萬像素鏡頭，絕對似相機多過電話！

售價：$4,380

首部LUMIX手機

日系手機向來擅長攝影，單睇規格，1,320萬像素鏡頭的P-03C不算日系最頂級，但卻是Panasonic首部融合LUMIX相機功能的手機。用得LUMIX做招牌就知廠方對P-03C幾有信心，上至機頂快門和閃燈，下至鏡頭和手握位，可說是將整個LUMIX概念移至手機，若非在LUMIX旁邊刻上「Phone」字，確實難以分辨。

P-03C設計瀛味十足，卻融入LUMIX功能。	於手機少見的27mm廣角鏡頭，方便影大合照。	機側快門鍵可作半按對焦。
可插入microSDHC，影多幾幅相都冇問題！

iA智能拍攝功能

影相操控方面，大家只需輕按機側快門鍵，即可啟動拍攝模式，功能表則可由中央轉盤或觸控進行設定。最吸引是拍攝時可像GF2一樣篤芒對焦，而且由對焦到拍攝大約兩秒搞掂，值得一讚！Panasonic更將相機的獨家技術如iA智能模式及Mobile Venus Engine處理器加進手機內，前者可自動轉換場景及拍攝設定；後者大大提高運算速度，有效控制高反差等環境，令室內或戶外拍攝的效果更好。

拍攝時可以篤芒或按快門操控，介面有點似GF2。

除可拍攝1,320萬像素相片外，亦可攝錄720p高清片。

iA備有11個場景模式，另可轉成英文介面。

3.3吋觸屏按鍵

P-03C機面的手機功能亦毫不遜色，沿用一貫日系修長機身，備有3.3吋輕觸式屏幕，配合滑蓋鍵盤，方便篤芒打字兩用操作。小記試用時，篤芒切換介面流暢，更可利用中央轉盤快速選擇Menu和睇相，用落十分爽手。值得一提是，P-03C機前的圓形功能鍵均具發光功能，中間會發出紅藍光，而兩旁4顆則會發出白光，不失日系機的精緻。