話說Alain Ducasse又親臨香港，為了宣傳他打造的「Signature Cookpot」，於11月30日做了一場「出巡＋煮飯」大騷：首先勇闖旺角街市親自選購新鮮蔬菜，繼而回到那家酒店的親生仔餐廳「大匙羹」示範用Cookpot煮蔬菜，再接受部分傳媒訪問。整件事非常順利，除了街市檔主嫌記者太多閃燈太強而大送粗口，除了Ducasse先生動作太快不肯企定定給傳媒拍照，除了「大匙羹」廚師不肯接受公關要求為我用Cookpot煮季節限定的新鮮無花果（你想死嗎？）其餘皆非常順利。
那個Cookpot呈圓形，兩端收窄像嘴巴，據說經過18個月的設計和測試，證實可Keep住煮菜時的水分，用來慢煮蔬果真是一流，避免了「乾憎憎」的問題。Ducasse大人的確是不簡單的食壇達人，不只賺了19粒米芝蓮星和幾百桶金，連做煮食器具都一絲不苟。
Ducasse做騷後的3天，是香港米芝蓮公布日，有咁啱得咁蹺？難道待Cookpot報道出街時，碰上摘星事件，雙囍臨門呢？公關回覆：「Ducasse先生一向每年11月來港……」在餐廳工作的死黨卻靜靜雞告訴我：「你等多3日啦……」果然！Ducasse大人貴為米芝蓮「熟客」，提早收到風一點也不稀奇，亦不代表出了術──既然某些強大酒店集團都冇星星，這酒店又何德何能打茅波？況且有傳言謂，首屆香港米芝蓮公布時，該酒店信心十足派代表出席記者會，結果慘食白果勁尷尬，今年未公布前保持低調實屬明智啊。
旅遊飲食寫作人