K580-i7顯示火力強

身邊有唔少朋友都沉迷《COD》等槍Game，畫面靚、音效勁，不過衰在對電腦嘅要求都相當高。與其呻Lag機畀敵軍偷襲，不如換部新機加強火力！內地大廠神舟（Hasee）繼早前推出平價i7筆記簿後，近日加推K580-i7旗艦機種，率先換上強勁嘅GeForce GT 445M獨立顯示卡，以後出街都可瞬間KO敵軍。

售價：$7,830

頂級顯示打機流暢

作為Game迷，眼見新出遊戲畫面愈來愈靚當然開心，但部舊電腦始終跟唔上時代節奏，窒機之餘又話要調低畫質先玩到，極之冇癮！今次K580-i7首次用上GeForce GT 445M顯示卡，試跑《3Dmark06》破萬分，再試玩《COD: Black Ops》遊戲，即使有爆破或者密集戰場畫面都冇Lag機，抵讚！不過要留意，機身配備15.6吋LED屏幕，夾埋電池有成2.8kg，拎出街隨時手抽筋。

八千有找抵玩Core i7

論規格，K580-i7採用四核心2.8GHz處理器，莫講話開十幾個網頁，就連剪片執相呢類工作都暢通無阻。雖然神舟係國產品牌，但單係一粒Core i7-640M處理器街價都要成$2,000，其他美日品牌嘅同級筆記簿起碼過萬，現在新機唔使八千蚊就有四核心極速享受，仲夾埋4GB記憶體及500GB硬碟，絕對抵玩！

用15.6吋芒打《COD: Black Ops》，開高畫質都極之流暢。

隨機附送4,400mAh電池，帶出街玩幾小時都冇問題。

《Windows Experience Index》顯示遊戲效能達6.7分！

用料十足擴充性強

其實內地唔少品牌已經做得甚有規模，神舟仲係一線電腦品牌，論造工和QC都唔使太擔心。今次K580-i7採用黑色暗花光面設計，講樣雖然冇乜特別，但勝在有Full Size鍵盤，連數字鍵都有齊，用作文書處理和打機都很方便。擴充方面，機側DVD燒碟機和讀卡器等一應俱全，最特別係有HDMI和eSATA插頭，實用又方便。

銀色Touchpad設計時尚，但想打機還是加裝滑鼠為妙。	可惜只有DVD燒碟機，如果有埋Blu-ray就更完美！	Full Size鍵盤尺寸啱啱好，打字和打機都很方便。
機側備有HDMI、讀卡器等，較特別係有個USB＋eSATA插頭。	機背採用黑色光面設計，頗易留低手指模。