「Buick」呢個名字，對香港車迷而言可能會感到陌生，其實佢係通用汽車旗下一個已有百多年歷史嘅老品牌。由於車款設計向來以實用為賣點，車款都比較斯文，部分甚至畀人老土嘅感覺。直到高性能轎跑Regal GS嘅出現，其充滿運動氣息嘅外形，配合255匹強大馬力，令人對該品牌改觀。
Buick Regal GS嘅造型望落熟口熟面，原來呢款車型跟兄弟車廠Opel嘅Insignia OPC幾乎一模一樣，只係換上咗Buick徽章，以及配搭上不同動力系統。但無論如何，Regal GS將會成為振興Buick嘅重要車款。
筆者覺得Regal GS最耀眼嘅部分，莫過於設置喺車頭泵把位嘅兩個垂直進氣口，配合金屬內框作點綴，令整體外觀兇惡不少，鬼面罩則換上咗直柵式配以Buick廠徽設計。此外，頭冚近A柱兩個角落附有長形通風口，觀感佳又有助引擎散熱。流線嘅腰背線條，由車頂沿着C柱延伸至車尾嘅擾流小鴨尾，左右兩邊排氣喉與尾泵把整合，並以金屬裝飾包裹，凸顯出高性能汽車嘅魅力。
動力方面，Regal GS採用2.0公升Ecotec引擎，加入渦輪增壓系統與缸內直噴技術，可輸出嘅最大馬力及扭分別為255匹及40.7kgm，搭配六前速手動波箱，0~100km/h約5.8秒。於驅動裝置方面，底盤採用四輪獨立懸掛結構，配備IDCS互動式驅動控制系統（Interactive Drive Control System），有Normal、Sport及GS三種行車模式，電腦會針對不同模式而自動調整懸掛設定、油門反應，以保持行車穩定性。同時，20吋輪圈以及Brembo通風碟搭配四活塞高強度鋁合金卡鉗，大大提高汽車嘅抓地力及制動力。
Regal GS內櫳以黑色為主調，大部分位置都以皮革包裹，配合銀色金屬裝飾，仲有賽車化三幅式多功能真皮軚環、金屬踏板、Recaro電動調整真皮賽車椅等標準配置，儀錶板採用咗藍色光圈作點綴，整體感覺充滿時尚氣息。Buick向來走中高檔路線，呢類高級配備及裝飾設計梗係唔少得啦！
撰文：賴以堅