新牌駕駛 瓣瓣Check真至安心

開車3件事

唔少新牌仔買車之後第一時間出外兜番轉，感受一下駕駛嘅樂趣，之不過喺開車之前，千祈唔好忘記一啲事前準備。

第一、要調校倒後鏡至完全望到車外嘅情況：好多意外就係駕駛者未能清晰觀察路面情況所致。

第二、調校座椅及軚盤位置：有啲朋友將椅背校得太後，十足賽車咁款，咪以為咁做好型，此舉不但令駕駛者睇唔清楚前方路面，仲會對腰部造成極大負荷，影響健康。

第三、檢查輪胎：呢個步驟最易被人忽略，其實每次開車前檢查輪胎狀態，睇吓有冇漏氣、需唔需要換胎等，同樣可以減低意外發生。

開車前應校好倒後鏡，咁就唔使擔心睇唔清楚喇！	為免阻擋視線及油門控制，將座椅調校至合適高度。	開車前Check吓輪胎，咁就萬無一失！

戒掉壞習慣

唔少司機喺駕駛途中，都會「一心幾用」，新牌仔千祈唔好有樣學樣，事關呢啲壞習慣隨時成為意外嘅成因。或者大家會認為，飲啖汽水、食啖麵包，可能只需要一秒時間，但意外往往就喺呢一秒內發生，單手握軚既影響操控，分神之下亦會影響應變能力。

有啲「愛煲粥」嘅朋友，認為使用免提裝置就唔會有問題，但其實一樣存在風險，事關講電話或會令你分心，尤其傾得太投入，更難兼顧路面情況。

聽歌冇壞，但炸機就唔好喇！

拎住手機睇短訊，不但會觸犯法例，仲會增加意外風險。

遇氣流宜收慢

大家都知道行車時要與前車保持兩秒距離，但偏偏有啲人鍾意貼住人哋車尾嚟行，若然前車突然緊急煞車，便沒有足夠的煞車距離。另一方面，如遇上塞車，就千祈咪心急，需要過線記得預早打燈，並於安全情況先好過線。而喺高速公路行車時，一定要保持鎮定，尤其經過大車（如貨櫃車）側邊，或會受到氣流影響而導致輕微失控，呢個時候，記得緊握軚盤、收慢車速，唔使慌o架！

Subaru R2慳油又實用

R2體積細小，但車廂空間一啲都唔覺得狹窄，而且慳油好力，最重要係車價只需十餘萬，難怪成為新牌仔熱選車款。

R2規格表

車型：五門四座位揭背車

引擎：直四DOHC 16氣閥

容積：658c.c.

傳動：i-CVT波箱

最大馬力：54ps/6,400rpm

最大扭力：6.4kgm/4,400rpm

驅動：前置引擎、前輪驅動

懸掛：（前）L臂配扭力桿（後）雙連桿

制動：（前）實心碟、（後）制動鼓

車身體積：3,395×1,475×1,520mm（長×闊×高）

撰文：賴以堅

攝影：黎劍華、賴以堅

模特兒：Florence、Frankie（Inspire）

汽車提供：Motor Image（2511 2727）