Michael遊曼谷狂擦38碗魚蛋粉

出外搵食，只要有少年食神Michael，保證一日食完7餐、再7餐。再加上，Michael本人食量驚人，隨時隨地打破他自己的狂食紀錄，都會引得你跟住佢食食食── 好像在台灣「1分17秒鯨吞鰻魚飯」、沙巴「狂食18個咖央包」、北京「掃幾打餃子」……今次來到泰國曼谷，Michael發揮他一貫「食咗先算」的本色，一口氣狂擦38碗魚蛋粉，說時遲，那時快，就打破咗舖頭的勁食紀錄，店員都直豎拇指話佢勁！

叫得做「食神」，除咗識食，仲要食得，食38碗魚蛋粉，對Michael來講濕濕碎啦！

河粉兩蚊兜鯨吞38碗

泰國的魚蛋粉出名好味道，平均30 Baht（約HK$7.5）就有一碗，絕對平靚正。今次，有Michael帶路，更找到超平的9 Baht（約HK$2.2）河粉！位於BTS Victory Monument站市集的9 Baht河粉，收得咁平，分量自然會細好多，雖然只有平時的1/3，但勝在多款式，一次過可以試晒不同味道。

9 Baht河粉的店舖格局乾淨又骨子，食得放心。

配料有魚蛋、牛丸、豬肉、牛肉，湯底有冬蔭功和清湯兩款選擇，而麵底就隨你在河粉、金邊粉、米粉之中任揀，放湯或乾撈都冇問題。通常一般食客一入舖都會柯打幾碗，難怪出面的廚師做到像摩打手一樣！

咁多款點算好？我決定樣樣都試，最後覺得冬蔭功牛肉米粉最正！因為Size細細，不少男士都可以食一打，不過有員工靜雞雞話，食店的最高紀錄係一次食29碗，Michael聽到立即笑說：「29碗啫，易過借火啦！」說罷，他一碗接一碗，好像不用o趙咁啪晒落肚，連員工上菜速度都跟唔上佢。最後一數，Michael幹掉了38碗之多！我們一枱4個女孩子，夾埋都是食咗31碗咋……勁！

9 Baht河粉

位置：BTS Victory Monument 站出，走過行人天橋往對面的市集內

廚師做到摩打手無停過，快到我想影相都變了鬼影。

9 Baht河粉有冬蔭功及清湯湯底，豬牛魚蛋等，多種湯底及配料任你揀。

我們一行4個女孩子，最後食了31碗，戰績都算不錯。

粿汁粉攤檔晚上座無虛席，想食就要慢慢等位。

唐人街狂掃大牌檔

曼谷唐人街出名食魚翅同燕窩，但跟Michael又點會咁行貨？這裏的大牌檔已有幾十年歷史，全是老字號，晚上食客眾多，經常爆場，不過店舖名都係泰文，佢識我，我唔識佢，大家惟有認樣記位置啦！

我們第1站是Michael大讚的粿汁粉。粿汁粉是泰國華人區獨有的食品，它不是甜品，而是類似福建用糯米粉做成的「鼎邊趖」。粿汁粉入口超煙韌，胡椒湯底辛辣惹味，豬雜和燒肉又夠入味，簡直是完美的配搭。

Michael另推介炭烘麵包的攤檔，燒麵包燒足50年的黃老闆，用上大大個炭爐來烘麵包，烘得鬆脆又唔會燶，更有牛油煉奶、咖央、朱古力等汁料可選，自問夠膽、腸胃又強壯，不妨挑戰腐乳辣椒醬。

在麵包攤檔旁那檔滷水豬腳飯，也不能錯過。Michael話：「那一鍋濃濃的滷水汁，將豬腳燜得入口即溶，肥美的皮脂，入味的豬腳肉，配上同樣惹味的滷水豆腐，好味得完全不可挑剔！」講到豬腳肉咁好味，連本來不食豬腳的我，也被引誘得食了一口。嘩，好味到最後自己霸晒成碟，掃清光！

粿汁粉

位置：耀華力路街尾（經過林珍香往前走，左手邊第一個路口）

炭烘麵包

位置：T&K海鮮對面大牌檔

賣粿汁粉的街口兩旁都是熟食大牌檔，有很多消夜選擇。	煙韌的燒肉豬雜粿汁粉，配上辛辣胡椒湯，一個人都可以食到兩碗，30 Baht（約HK$7.5）。	粿汁粉本來是一塊塊的，煮完就會自動捲起來，好得意。
脆口又夠鹹香的燒肉，正！	這裏用上炭爐烘麵包，可一次過烘很多麵包及多士。	炭烘出來的多士非常脆口，加上朱古力和咖央醬，好味到停唔到口。
入口即溶的滷水豬腳飯，非常軟腍，令人回味無窮！35 Baht（約HK$8.7）。	香噴噴的豬腳、滷水豆腐跟雞蛋，就是藏在這鍋的滷水汁裏。