Android滑蓋新作鍾嘉欣愛Z形

HTC近期人氣急升，繼早前HD7後，另一高階機Desire Z正式登場！新機除了係少數Android手機內建QWERTY鍵盤，Z形滑蓋更是HTC首創，難怪鍾嘉欣試玩完都話：「Z形變個鍵盤出來好特別，以後打字更方便！」玩完鍵盤都未夠，仲要加埋3.7吋巨芒、720p高清拍片，咁勁嘅規格都幾難忍到手。

售價：$4,698

Z形鍵盤滿字根

講起QWERTY鍵盤嘅Android 手機，大家可能會諗起摩記Milestone。但用過Milestone嘅朋友都知道，冇字根兼冇中文輸入，用落點都唔方便。港版Desire Z就明白港人需要，四排鍵盤加晒倉頡字根，咁就唔使估估吓咁煩啦！而創新的「Z Slider」滑蓋式設計，推鍵盤時會將屏幕升起再Z形放落，有別於一般推蓋設計，所以打字時屏幕絕唔頂手，仲令機身厚度大減，配合3.7吋多點觸控屏幕及機身的Trackpad，操控反應一流。

Android 2.2玩Flash

現時Android 2.2機款唔算多，而且大部分因硬件唔夠勁未能支援Flash 10.1。今次Desire Z用上800MHz處理器，加埋512MB RAM令手機操作更順暢，小記即場試上on.cc網頁，無論Flash及短片播放都清晰流暢。值得一讚係機身內置500萬像素自動對焦鏡頭外，更新增不少玩相功能，好似雙人自拍、漸暈特效等，仲可拍埋720p高清片，「分唇」攞滿分！

四排鍵盤附有倉頡字根，HTC仲為鍵盤加入快速指令，如Fn＋R就係回覆短訊。

推蓋時會將部分芒升起，鉸位變成Z形，所以咪叫Desire Z囉！

新版Sense玩變臉

HTC Sense可說係HTC嘅招牌作，嚟到Desire Z更引入新版設計，雖然主頁仍然係熟口熟面嘅揭頁式時鐘，但內裏容許玩家自訂介面，可將7頁主頁位置任意轉換。此外，大家還可幫Sense換主題介面，咁下次換頁就更容易識別啦。同場另有HTCSense.com新服務推出，利用雲端技術以電腦控制手機，當中較特別係能夠遙距追蹤手機位置，成日唔記得手機擺喺邊嘅大頭蝦實啱用。