大芒打機播片 HD7睇貼官恩娜

官恩娜最近同大隻外籍男友蜜運，但原來佢除咗揀男友鍾意大件頭外，連手機都獨愛大芒HD7︰「我用手機最怕眯起雙眼睇到眼花，所以HD7個4.3吋大芒就啱晒，用來睇片勁爽！」最正係HD7採用全新Windows Phone 7（簡稱WP7）智能系統，提供多款Xbox LIVE遊戲及本地Apps，畀你玩餐飽！

售價︰$4,998

翹埋手睇片

掛得「HD」名號，就知HD7係HTC旗艦之作。齋睇個樣，佢同舊款HD2近乎一樣，4.3吋巨芒配薄框設計，厚度維持在11.2mm，唔到你唔服。屏幕夠大，兼容度亦唔錯，播到晒WMV、AVI及3GP等主流影片格式，加埋480×800解像度，睇片夠細緻。機身上下更配有一組喇叭，睇片時可透過SRS技術營造環迴立體聲效果，仲可拉開機背隱藏支架橫置機身，以後睇片可翹埋雙手，Free到震！

最快Windows Phone

上代HD2內置Windows Mobile 6.5系統不敢恭維，今次HD7改行全新WP7智能系統，首先介面變晒做Live Tiles方塊，操作更直接及人性化。最大亮點係對應Xbox LIVE，暫時已知有50款遊戲上架，當中包括《Need for Speed Undercover》、《The Sims 3》，以及由本地開發嘅《Bowling XX》、《A Bugs Defense》等。現場試玩賽車遊戲，拜內置1GHz CPU所賜，甩尾入彎反應真係好鬼爽，平心而論快過晒以前啲Windows Phone！

鏡頭前內置隱藏支架，拉開後可橫置承托機身。	機身厚度薄過直立一毫子，真係服咗廠商嘅偷位工夫！	機頂有3.5mm Audio介面，戴住耳筒便聽到SRS環迴音效。
4.3吋巨芒HD7升呢上WP7系統，拍埋3.5吋芒嘅iPhone 4（左）即刻贏晒。	鏡頭同HD2一樣係500萬像素，但追加咗720p拍片功能，記憶體仲有16GB咁大。	在Xbox LIVE玩到50款遊戲之餘，仲改到Avatars分身。

本地Apps任玩

HTC玩開Sense介面，但由於WP7唔容許廠商改動公版設計，所以成個介面飛走咗。然而，HTC取巧地提供一個叫「HTC Hub」嘅Live Tiles，內裏「分唇」跟Sense九成似，例如有天氣預報、股市、計算機、單位轉換等，另外又有全新「Photo Enhancer」工具畀用戶執相。HTC講到明新工具將陸續登場，等用戶Keep住新鮮感。當然有人會話Apps唔係為港人而設，呢方面Microsoft其實已出咗大量本地Apps，好似《電影速遞》及《行Guide》等，唔差得過iPhone 4。