電腦戰機Temjin巨劍長過人

經典3D機械人

《電腦戰機Virtual On》係世嘉著名3D機械人射擊遊戲，首集於1995年在街機登場，隨後移植至世嘉Saturn及PS2上，衍生咗唔同系列，當中PS2嘅《Virtual On Marz》故事最為人熟悉，講述Temjin被派往營救赤道戰區中失去聯絡嘅同伴，與不明勢力連場惡戰。而新系列Force更將於今年12月22日在Xbox 360推出，等唔切的話不妨入住呢隻跟足原著造型嘅Temjin頂住癮先。

Temjin頭部造工仔細，比當年街機版更具線條美。	右手肩甲印有MBV-04嘅型號標記，雖然手肘得單關節，但向外屈嘅幅度相當大。	腳部有三重關節，膝蓋可單獨扭動，可動性不俗。

Ver. Ka神髓再現

叫得Ver. Ka，當然唔少得KATOKI造型特徵，好似美型流線機體比例、真實嘅細節處理等。今次呢隻Temjin真係交足功課，身高約140mm，主體藍白灰三色成形，簡單利落。機身上具代表性的圖案，同埋手臂和腳側坑紋，再配合巨劍、手槍、手榴彈及多款手部配件，完全塑造出90年代遊戲嘅獨特Cyber感，可以說KATOKI這個「爸爸」做番自己「親生仔」認真Perfect Match！

多得下半身優秀嘅活動能力，連腳掌都加入雙關節，跑步發炮夠傳神。

打過《Virtual On》一定記得呢件經典武器「土製菠蘿」！

光碟疾刺擺甫士

論活動能力，新作一啲都唔輸蝕得過超合金，唔好以為佢「全膠宴」就唔襟玩，其實佢胸口、手腳等部件勁硬淨，配合膝蓋三重關節，擺出提劍、衝刺、槍擊等富動感嘅姿勢真係完全難唔到佢。最正係連腳掌都新增兩個關節，可隨時屈起做出跳躍動作，絕對有驚喜！而KATOKI更將遊戲入面Temjin嘅V形變流器變成部Saturn遊戲機，加埋把充滿特效嘅巨劍，大家擺怒劈甫士時，就記得打開背蓋，重現光碟升起一幕，令絕招動作更逼真！

放大圖片	V形變流器變成世嘉Saturn遊戲機，打開仲見到隻CD㗎！	配件相當充足，滿足晒喜歡擺甫士影相嘅《Virtual On》迷，勁正！

Temjin進化史

Temjin咁多年來響唔同作品出現過不同版本，更可見（左起）外形一代比一代Cyber！

‧1995 《電腦戰機Virtual On》（街機）

‧1998 《電腦戰機Virtual On Oratorio Tangram》（Dreamcast）

‧2001 《電腦戰機Virtual On Force》（街機）

‧2003 《電腦戰機Virtual On Marz》（PS2）

撰文 ：廖俊斌

攝影 ：張群生

查詢電話 ：2433 1828