要比較今時今日嘅遊戲製作技術，日本Game廠真係冇得同歐美公司鬥，而且食老本問題都幾嚴重。但估唔到Platinum Games向高難度挑戰，最近推出向來係日本Game廠弱項嘅射擊遊戲《Vanquish》，除咗開槍玩Head Shot外，仲可以開Turbo高速滑行搵掩護和殺敵，確係幾好玩。
舊年開發出「Fami通滿分遊戲」《Bayonetta》嘅Platinum Games，以超高速同超華麗動作殺出一片天，今年轉戰射擊遊戲《Vanquish》，一樣以超高速為賣點。故事講美國太空站畀俄國恐怖分子佔領，仲用太空武器炸毀三藩市，威脅美國投降，身為美國國防部特務嘅Sam，要穿上裝甲以暴易暴，搶太空站返嚟。
新作由日本著名製作人稻葉敦志同三上真司揸旗，細位設計上比較有諗頭，如主角Sam所穿着嘅強化裝甲ARS既冇同類遊戲《GOW》咁重型，更用上納米技術製作，輕身又堅韌，加上背後的噴射推進裝置，可在短時間內加速移動，譬如在槍林彈雨間搵掩護，或者高速轉移到敵人後方偷襲都掂。最特別係這套裝甲可以發動Augmented Reaction Mode強化反應模式，學晒《Matrix》咁慢動作避子彈，即時將周圍物體的動作速度減半，仲可以跣住開火做出型仔射擊動作，淨係甫士已經攞滿分。
遊戲入面用到嘅武器跟同類遊戲差唔多，好似機關槍、手榴彈等，比較特別係某些版圖會設有砲台，亦有可從空中發射雷射砲，方便從遠距離作大規模攻擊。雖然《Vanquish》畀人幾重《GOW》嘅感覺，但近身戰就唔係出電鋸，反而係玩拳腳功夫，有啲玩緊動作遊戲Feel。在畫面方面，《Vanquish》確實做到西方射擊遊戲水準，不過唔知點解竟然冇連線模式，始終射擊遊戲都係約埋朋友上網開局好玩好多。
售價：$338
類型：射擊
開發：Platinum Games/SEGA
平台：PS3、Xbox 360
推出日期：10月21日
查詢電話：2620 6667
撰文 ：布偉倫