《西遊記》故事大家都耳熟能詳，但如果話畀大家聽原來孫悟空同唐三藏都係奴隸，唐三藏仲係一個成日着住Tube Top嘅女仔，大家會唔會「O嘴」呢？以上講嘅係剛推出《Enslaved: Odyssey to the West》的角色設定，利用《西遊記》借題發揮，發展成一套科幻嘅動作冒險遊戲，用如意棒打各式各樣機械獸，玩落去又真係幾過癮！
如果拎番《西遊記》故事去睇呢套遊戲真係頭都大埋，一嚟角色造型經過大改造，二嚟時空同場景都唔同晒，遊戲講150年後的未來世界，人類變晒做奴隸，由機械人話事，一開頭男女主角就已經要逃出奴隸飛船。男主角自然係孫悟空，遊戲入面就叫做Monkey，係一個身手敏捷但行事鹵莽的男人；至於唐三藏就化身成樣靚身材正女科學家Trip，用金剛箍收服咗Monkey，命令佢幫手搵路返屋企。
雖然話就話有兩個主角，但基本上Trip唔多使郁，一切體力勞動都係由Monkey代勞，只係有部分場景需二人合力去解謎，隱約見到原著故事嘅意念。咁一同去取西經嘅豬八戒同沙僧又有冇份出場呢？遊戲中段有個肥仔現身，佢就係豬八戒Pigsy，但就唔多見沙僧蹤影。雖然背景設計為咗遷就西洋口味而有少少修改，但動作同畫面處理就真係一流，原來製作小組請來在《魔戒》電影做咕嚕的演員，以Motion Capture形式捕捉每個動作細節，即使Monkey成日要跳來跳去，動作都能保持細膩流暢，抵讚。
Monkey話明係孫悟空化身，雖然冇細數係咪有72變咁多，但就可以使用如意棒伸長縮短喪打機械人，仲學晒《無雙》咁儲氣出超必和使用連招，場面十分華麗。遊戲加入咗唔少有趣嘅新招，譬如使出觔斗雲用天上的炮台打機械獸，仲可埋身扭甩機械獸個頭，暴力得嚟並唔血腥。初時出場的機械獸大多好似蜘蛛咁手長腳長，玩落唔知會否見埋機械版白骨精、鐵扇公主同牛魔王呢？連日本遊戲雜誌都選呢隻遊戲入「金殿堂」，絕對值得一玩！
類型：動作冒險
開發：Ninja Theory、Namco Bandai Games
平台：PS3、Xbox 360
推出日期：已推出
售價：約$358（PS3）、$318（Xbox 360）
查詢電話：2725 3338
撰文：布偉倫