EOS 60D反轉創意色調

直到目前為止，其他相機都無法取代單反的位置，雖然多數又大又重，但係單反總令人倍感專業，許多攝影師在工作時仍會使用，甚至用來拍片。Canon今次又為EOS系列增加新成員60D，成為家族中首部可反芒單反，仲加入多種玩味功能，為一眾拍友帶來喜訊。

旗下首部反芒單反

Canon一向都行穩陣路線，相信C迷等反芒經已等到頸都長，不過勢估唔到首部反芒會於中階機種60D出現。單反顯示屏當然要有高質素，60D就配備3吋104萬像素反芒，高炒低炒都較方便，反轉個芒自拍亦更準確。至於影像感應器則繼承7D的1,800萬像素CMOS，強化集光能力之餘，亦減少雜訊產生，難怪感光度可擴展到ISO 12,800。配合DIGIC 4數碼影像處理器，加上防止反光鏡回彈裝置，最高連拍達到5.3fps，最多拍58張，總有一張啱心水。

售價：$8,480（淨機身）、$10,980（連18~135mm鏡頭）

60D沿用7D的CMOS影像感應器，備1,800萬像素。

Canon首次EOS系列中加入多角度顯示屏，高炒低拍亦可。

拍片加收音咪

60D提供全高清拍片功能，今次更可選擇多種影片質素，及以每秒24格或25（PAL）/30（NTSC）格來記錄，喜歡電影的拍友當然最好選擇1,080@24p的全高清影片。別以為單反不能用於攝錄大場面，當接上收音咪時，用家可以手動調校多達64級錄音水平，還新增電子風聲過濾器，保證收唔到雜音。如果大家鍾意用Live View即時顯示模式，此機加入的長寬比設定就大派用場，此機提供1:1、16:9、4:3及3:2 4種不同比例，比例剪裁線會顯示於拍攝介面，構圖就更方便。

60D加強了拍片功能，就連影片質素都有５種選擇。

專用手柄採用高階單反的手柄設計，側開的電池位置令手感更佳，多影直度的拍友可以$1,580購買。

專用手柄採用高階單反的手柄設計，側開的電池位置令手感更佳，多影直度的拍友可以$1,580購買。

多種效果任玩

60D新加入「Basic+」創意效果，最啱對相片有要求又初學影相的人。用家只要在模式轉盤切換到「CA」模式，再設定「Basic+」創意效果，就可以拍出鮮艷、單色、冷調等9種效果，而且可用於其他場景模式，玩得更Free。如果覺得影相時效果唔夠突出，用家可於事後作編輯，利用創意濾鏡做出粗糙黑白、柔焦、玩具相機或模型效果，而且濾鏡可以多次使用，發揮大家的創意。