第一身射擊（FPS）Game玩得多，打喪屍遊戲亦不少，一個Game內可以射喪屍、木乃伊和邪惡未來戰士的就較少見，所講的是《Head Shot殲滅者Online》，而且玩家仲有機會換埋套香港警察PTU制服，兼有廣東話配音，一邊爆粗一邊殺敵，都咪話唔過癮！
Gameone近期都出幾多Facebook Game，繼《凱撒》之後，又有全3D第一身射擊遊戲《Head Shot殲滅者Online》，遊戲畫面與《CS Online》有幾分相似，但節奏更快更刺激，3D效果亦做得不錯。遊戲內設有不同模式和關卡任務，較有新鮮感的是「木乃伊」煉獄模式，當開始後15秒，系統會將其中一位玩家變成「木乃伊王」（分分鐘會係自己），最恐怖是它可以將人類感染變成木乃伊，所以打的時候除了目及實敵人，仲要留意身邊的戰友會唔會已經變了木乃伊，氣氛緊張恐怖。
另一種「喪屍」模式更加難打，遊戲內會出現5種異化喪屍，各有專屬技能，包括專門玩隱形暗殺突擊的「虛空影魔」、能夠高速移動的「疾命行者」、靠殺人類補血的「嗜血祭司」、遠距離將人定格的「幽冥經師」，以及高傷害高血量的巨無霸「腐肉戰車」，真係靠有勇有謀，兼且要有一班實力相當的戰友，先至有機會贏。《Head Shot殲滅者Online》仲有一個極富挑戰性的任務，就是殲滅未來戰士。玩家只要透過「賞金任務」完成6道關卡，就可以得到豐富道具獎勵。關卡完成的條件不一，如「直取首級」任務要求玩家命中馬薩奧的頭部，最高難度的「終結任務」更要同時應付未來戰士和異化喪屍的攻擊。
為了令香港玩家玩得更投入，《Head Shot殲滅者Online》特地加入了廣東話配音，而且講的都是香港地道用語，更有傳神的爆粗演繹，簡直是挑戰遊戲史上的語音尺度。更意想不到是可以換上香港警隊制服，無論視覺和聽覺上都夠晒地道，分外有親切感！
類型：第一身射擊
推出日期：今日
網址：hs.gameone.com
撰文：陳若冰