HTC Aria 玩Goggles一影查影點

早前手機廠商偏向推出大屏幕機款，動輒4吋或以上，你睇HTC HD2、Toshiba TG01 ，男仔都嫌大，何況手掌細幾吋嘅女士？今次HTC新機Aria，機仔細細功能十足，用「五臟俱全」嚟形容佢就啱晒，各位女士們銀包準備出血喇！

機身輕巧女士易操控

以往HTC推出的輕巧機款如Diamond系列、HD Mini等都極受歡迎，市場仍有一班用家「捨大取小」。今次推出Aria，主打輕巧方便，3.2吋HVGA電容式觸控屏幕、鋼琴面機身，而且Size啱啱好，在場Model拎上手都唔覺大部；機面只有主要4個按鍵及光學感應器，夠晒簡潔。用上Android 2.1平台，配合介面夠靚又實用嘅HTC Sense，新試智能手機都容易上手。處理器速度達600MHz，加上512MB ROM、384MB RAM，筆者在場試用，運作非常暢順冇窒機。

Friend Stream 朋友易聯繫

依家社交網、網誌同相簿咁流行，朋友聯繫更緊密。但係咁多Account，逐個Log in都咪話唔煩，HTC Sense提供Friend Stream功能整合多個社交網絡程式，包括Facebook、Twitter等，用家可以一個頁面睇晒朋友們嘅訊息更新，以後唔使轉嚟轉去啦。內置500萬像素鏡頭，支援自動對焦、臉部對焦，Upload生活照、自拍照冇問題！值得一提如上Smartone-Vodafone 台再用埋X-power服務（月費$36），就可支援Flash網頁瀏覽，雖然只係Flash Lite，但網上劇集都睇到，讚！

同Desire（右）一比就知Aria有幾細部，女士們唔使驚喇！

機背設計獨特，有4粒仿螺絲於四角。

內建Dr.eye 生字易查詢

平時睇書、行街，總會見到啲英文生字唔識解、唔識讀，HTC Aria非常體貼地內置《Dr.eye》字典，方便隨時隨地查字，最緊要係有埋例句同發音，功能齊全，下次見到生字就再冇藉口話唔識！講開「查」，有時見到某啲事物可能唔知係咩，Aria支援Goggles功能，你影完幅相之後，隨即幫你分析相中事物，文字、地標、書本、藝術品等全部可以查到。除Goggles之外，Aria配備大量Google其他服務，包括Google Maps等，出街唔使驚蕩失路。