等車磨時間 必玩3D俄羅斯

撰文：林子聰

益智類

益智遊戲向來給人沉悶的印象，其實有不少益智遊戲相當有趣。好似今次介紹兩隻益智遊戲，畫面繽紛之餘，大人、小朋友都啱玩。

Tetra Defense 3D俄羅斯方塊

俄羅斯方塊相信好多人都玩過，如果你玩到厭，不妨試吓《Tetra Defense：Attack of the Tentacle!》。玩法同普通俄羅斯方塊大同小異，不過係立體版，難度大增，立體感強嘅玩家有着數。

售價：0.99美元（折約$7.7港元）

Tetman iPhone大咕窿

日本同香港都極受歡迎嘅節目依家iPhone都有！不過唔同嘅係，遊戲有6個動作畀你揀，揀中就過關。唔好以為看圖過關咁簡單，因為圖案相似，加上遊戲速度愈來愈快，除咗考你反應，仲考埋記憶力，名副其實要「眼明手快」！

售價：0.99美元（折約$7.7港元）

運動類

運動遊戲好多男仔都鍾意玩，貪佢夠刺激！不過今次唔係介紹《Pro Evolution Soccer》一類大路運動Games，而係結合運動元素嘅小遊戲。

Solipskier 空中滑翔人

玩家要幫滑翔人畫雪地，等佢有落地嘅位置。重點係要令滑翔人滑得遠啲、停留空中時間長啲。滑翔時會有黃色網、隧道幫你加速，不過亦有紅色網同跳台要避開。如果你滑得又快又高，滑翔人有時間做花式就會有Bonus。

售價：2.99美元（折約$23.3港元）

Pro Zombie Soccer喪屍射龜

踢波輸咗畀人射龜就試得多，今次輪到你射喇！不過射嘅唔係人而係喪屍。喪屍幾十隻咁嚟，你要用波將佢哋逐一射死。另外，仲可儲氣出絕招，威力大增。值得一提係遊戲夾雜漫畫，過癮！

售價：2.99美元（折約$23.3港元）

動作類

動作遊戲最好玩之處係爽快又唔使用腦，呢兩個遊戲簡單得嚟又夠過癮，之不過搭緊巴士玩的話有機會暈車浪，小心！

Ninjump 百變忍者

「忍者」可算是日本的獨特文化之一，既神秘又特別。《Ninjump》中，玩家扮演飛簷走壁嘅忍者，左跳右跳，避開或者殺死障礙物。如果連續殺死同一種阻礙物3次就會出現特技，例如變狐狸、飛鳥等。

售價：免費

The Incident 擲死冇命賠

高空擲物可謂防不勝防，隨時中頭獎。若果你想學定閃避技巧，就要玩吓《The Incident》。你要避開一連串從天而降嘅垃圾，稍一不慎會被擲死。記住見到氣球、鑽石要衝埋去，Bonus嚟o架！