Mazda3 S奄尖少女都叫好

擁有多年駕駛經驗嘅模特兒Rita，以前試過四門房車，但就覺得三廂式房車過於斯文，而單門轎跑車又怕後座乘客上落唔方便，所以佢決定試試四門揭背車，既然咁多要求，一於搵嚟Mazda3 S，有外形又有實力，睇睇啱唔啱佢心水！

一眼見到就鍾意

傾開車經，Rita話佢睇過好多車，覺得Mazda3 S幾好款，流線型的車身仲有幾分跑格，所以話以為女士揀車傾向斯文小車，諗法確實相當Out，其實只要有膽色有技術，好似Rita咁鍾情動感車款又如何？「架車線條好靚，A柱斜度連接落尾部感覺一氣呵成，我最鍾意係佢個車頭，鬼面罩唔係太大，而下面個入風口面積大又有氣勢，頭燈組設計夠晒銳利，我第一次見到就好鍾意呢架車！」

駕駛席空間十足，坐得相當舒適。

尾箱拎嘢好方便

真係睇唔出Rita評起車嚟頭頭是道，講到車廂方面，佢最着重係車廂空間，舒適、實用缺一不可，而Mazda3 S雖然以跑味掛帥，但係車廂空間絕對拍得住一部家庭房車。「去大型商場Shopping掃貨，揭背車就有好處，如果尾箱唔夠位放，可以將後座摺平，就算放兩個大篋都冇問題，揭背尾門設計，拎嘢仲好方便。另外，頭先試坐後座，覺得腳部空間都唔錯，但係頂部就因為車身線條關係而壓縮咗，如果高佬坐入去就要遷就一下啦！」

起步爽操控好玩

Rita睇中Mazda3 S，當然唔係純粹外表咁簡單，原來佢都好鍾意追尋刺激。Mazda3 S最大馬力有成147匹，雖然未至於跑車級數，但車身輕嘅關係，跑起嚟都好好玩。當日喺大美督走咗轉，「起步好爽，力量集中喺後段，我頭先試過差唔多50~60km/h入彎，架車都係好咬地，感覺唔錯。而最好玩嘅係五前速自動波，用軚環轉波撥片可以自己話晒事，特別係入彎時快快拖入三波，成架車都好穩定。」Rita講到咁滿意，睇嚟佢都好快成為Mazda3 S車主，下次大家喺路上見到佢，小心佢爬你頭呀！

Rita好鍾意個天窗，因為假日佢會到郊區呼吸新鮮空氣。	軚環轉波撥片，Rita話增加操控樂趣。	後排一樣咁闊，做乘客都唔錯。
尾箱咁大，一次過擺十幾袋Shopping戰利品都得啦！	車身線條充滿肌肉感，外形突出。	鬼面罩面積較細，配合設計銳利感十足嘅頭燈，外形頗具氣勢。
線條設計流暢，跑味十足。	車門飾板同波棍台設計角度與車身線條一致，更為統一。	2.0公升引擎馬力輸出有147匹，實用勝一切。