傅穎破框而出
被冠以「宅男女神」始祖的傅穎（Theresa），以充滿誘惑的大膽內衣寫真強勢出擊，誓要擺脫「玉女」框框的枷鎖，無視大家的「色情」眼光，也不怕被指cheap，因為今次終極性感寫真可一不可再。
加入寫真集戰團的Theresa，在寫真集內大騷「事業線」，以性感內衣、比堅尼力拚一眾水着寫真口靚模，她笑說：「事業線係女仔都有，我係正常普通，一定冇佢哋咁深咁長，佢哋係壯觀，我唔係要比呢樣，如果比呢樣就唔使睇啦，我唔係賣弄身材，冇呢個天賦，唔係要突出身體某啲部位，係影出來個感覺好性感。」
着衫性感
Theresa主動向公司提出邀請日本潮界色情攝影師米原康正拍攝寫真，她很欣賞對方拍攝女性的肢態美，為求突破性感尺度，Theresa大膽豁出去，最激僅用手遮住戴了nude bra的上身，她笑說：「女仔除衫冇乜嘢睇，少布唔係啲乜，我覺得其他有着衫嘅仲性感。」
米原以拍攝日本AV聞名，但Theresa事先聲明絕對接受不到擘髀動作，雖然米原清楚她的性感尺度，但覺得她應該稍作放寬，她笑說：「有次我着住一字膊衫，米原過來拉低我件衫，我就拉番高，好笑o架，佢對我輕手好多。」衣着性感的她面對米原時，不會感到尷尬，身為日本人的他見多識廣，可能覺得她很小兒科，不放在眼內！
素顏示人
Theresa由「玉女」變身為「肉女」，可擔心被指cheap？她坦言驚大家以為她突然去脫：「其實我從來冇標榜過自己係玉女、乖乖女，原意亦唔係要做玉女喺圈裏面發展，我唔想畀個框框，框死咗自己，我接受能力好強，之前喺舊公司走嘅歌手形象都係sex appeal。」
在米原攝影鏡頭下，Theresa不擔心被人以AV色情眼光看待，但不排除人家會這樣諗，其實內容毫不色情，可怕被視作性幻想對象？她說：「冇得怕，我控制唔到人哋，睇你用咩角度睇，鍾意你嘅人會好鍾意，更加了解我。寫真集內我會素顏示人，一直有人覺得我好厚粉，覺得我個樣執出來，所以我特登唔化妝以真面目見人，將自己最真實一面呈現大家眼前。」今次終極性感造型是寫真集最後一次，之後她會改頭換面轉走新形象。
死敵避無可避
自嘲是非命的Theresa，總跟死敵鄧麗欣（Stephy）的名字扯上關係，她承認很不開心：「大家無論發生乜事，都走去問佢，佢有乜又走嚟問我，人哋會點諗？以為我借人哋宣傳，唔希望有咁誤會。感觸最深係用我寫嘅文章去寫成是非，好似用刀大力去捅自己，真係好唔開心！」她明白娛樂圈乃是非之地，避不到惟有豁然面對，她無奈的說：「唔知道幾時放過我哋？寧願傳緋聞好過。」她清楚知道演藝生命中撇不甩Stephy，正如「走音」兩字會跟她「last forever」！
性感兩女神
在寫真集中傅穎大擺性感誘惑甫士，在她眼中荷里活女星謝茜嘉艾芭跟台灣女星徐若瑄最性感，謝茜嘉樣靚身材正，舉手投足好性感，而她覺得徐若瑄好靚，五官楚楚可憐、身材平均，整體予人sexy感覺。
文：音樂組 攝影：司徒國榮 服裝：Fly girl（Top） 場地：The Continental Club@Gateway Hotel Hair:Vince Pang@IL Colpo（TST） Make up:Matt Hom@Annie G.Chan