磨刀霍霍

鉸剪、皮篋、工作枱

舊陣時興子承父業，父親是裁縫的華叔卻對造衫沒興趣，11歲跑到廣州學磨刀。「造衫款式唔係時時興，磨出利刀隨時可以用一世，咁先有挑戰性。」61年落到香港，咪騎着單車手拎皮篋，車尾擺住依家仲用緊的工作枱，在尖沙咀一帶搵食。

「嗰陣時搵人磨鉸剪，人哋唔知你乜水，點肯將搵食架生交畀你，後來想到拎這把開山祖師借給人用，仲要交保證金先放心給你磨。」說着拎起開山鉸剪，輕鬆剪開四層布「你睇，仲利o架！」

「右面呢把係北京客特登拎畀我磨。」磨完鋒口竟然磨幼了成個碼，難怪華叔話少點精神都唔得。

六十幾年都不知換了多少塊磨刀石，打橫磨薄了再打直磨，拍埋塊新石（後）方知鐵柱可以磨成針。

名刀背後的故事

說華叔是刀匠，不如說他是刀癡，對刀沒興趣和感情又怎能磨足六十幾年？遇到識貨之人更鍾意傾幾句，小記現場就聽了不少「愈利愈安全」、「唔好刮針板」等道理。見到靚刀更加愛不釋手，店舖內便珍藏了多把「非賣品」。

華叔拎起一疊快遞單：「廣州依家冇人識磨刀，唔係都唔會山長水遠速遞來香港，磨完再叫人收番上去。」	在德國表演磨刀絕技，一試刀鋒，班鬼佬當佢神咁拜。「依家佢哋叫我去，我都唔得閒啦，皮費、舖租、生意，去一去唔見幾萬銀。」	切番茄唔爆汁，削紙唔使用力，這些都是濕濕碎，刀夠鋒利的話會軋住頭髮，無鋒的話會跣落嚟。（普通人千祈咪學！）

自創九塊石磨刀術

絕世響刀震江湖 在雜貨地攤無意發現的絕世響刀，用鎚子打落去竟會像銅鑼一樣「噹~噹~」發響，係蟲係寶一過華叔手就知道。	開山祖師萬人剪 這把開山祖師奇怪地綁着紅繩掛在鎖匙櫃入面，伴隨華叔六十幾年，足見他念舊之情，而舊時的鋼水真係可以用一世。	百年剃刀無價寶 當年有後生仔拎伯爺支孖人牌剃刀來，華叔即話：「任揀店內五把刀，同你換這一把剃刀。」據講這刀有百年歷史。

直至三十多年前，在佐敦廟街開了這個二、三百呎舖頭，當年幾毫子磨一把刀，到依家幾百蚊磨刀都有，視乎刀款和質素而定。「唔係把把刀都『上石』，鋼水唔好受唔住我九塊石，磨都冇用，仲嘥埋我心機。」磨刀竟然要九塊石？華叔邊磨邊解釋：「以前師傅都係教兩塊石磨刀，九塊石係我自創的，由最粗到最幼，密度愈來愈高，最後呢舊天然『石蕊』值成幾萬蚊，依家磨剩最後一塊，磨完我都要收山。」

放大圖片	放大圖片	磨刀要由粗到幼一步一步進行，先用最粗的磨刀石打走捲曲部分。

排隊到出年

華叔很有性格，客人到舖頭買刀就免費幫你開鋒：「刀唔開鋒送都冇用，經我磨過的刀，剃鬚都冇問題。」說着舉起剛磨完的刀在自己頭上一擺，本應從頭髮跣下來的刀鋒，給頭髮軋住定了下來。「依招叫軋髮，能軋住方可剃鬚。」

華叔愛用毛筆滴水在刀和石上，唔似一般師傅撥到周圍都係水。	水石要滴水，油石就要滴油，作用係磨鋒時降溫和潤滑，愈磨愈細聲。	交替幾塊石後，最後到「石蕊」（即石山最中心部分），後面嗰塊值幾萬元。

有一年德國刀廠請華叔去交流，表演完磨刀剃鬚絕技後，班鬼佬嘆為觀止，到依家仲清楚記得。難怪客人從英國、法國、加拿大都要特登來買刀，連廣州北京都寄剪刀來給華叔打磨，各位想磨刀？依家排隊最快要等到出年。

磨刀留影

傳統磨刀工藝得到世人認同，華叔當然開心，但現時磨刀師傅買少見少，連內地人都要來香港磨刀，似要慢慢失傳。「之前有搵過徒弟，但佢哋磨幾下就嫌悶嫌污糟走咗，加上磨刀這一行搵唔到錢，我做到老花時都要退休了。」