將《GTA》嘅開放式玩法套落20世紀初西部牛仔世界，原來都幾有趣，諗到這條絕橋當然係Rockstar。《Red Dead Redemption》（簡稱《RDR》）冇車搶，冇警察打，但就可以畀大家騎住駿馬在美國西部同墨西哥執行任務或者作奸犯科，地圖比《GTA Ⅳ》更大，細緻度亦超乎想像地高，係必玩之選！
撰文：布偉倫
《Red Dead Redemption》的上一集《Red Dead Revolver》係04年嘅出品，今集《RDR》沿用《GTA》開放式玩法設計，除了主線任務之外，仲有大量支線任務可玩，而且特別在遊戲中嘅NPC唔再係死物，如果大家「唔覺意」殺死店舖老闆，之後間舖就會永久關門，有可能以後買唔到武器、食物等；如果某個小村落所有居民死晒的話，條村就會變成死城。遊戲中作惡係要付出代價，殺人後會被騎警追捕，就算畀你走甩，下次再犯案時，暗花會不斷增加，引到更多人圍剿，愈嚟愈難走佬，解決方法係乖乖交贖金換自由。
《RDR》畫面水準相當之高，主要原因係用上加強版RAGE Engine，另配合Euphoria物理模擬引擎，人體動作做得夠真實之外，甚至連馬匹、鹿、狼同豹等動物都好真。遊戲背景設定在1911年，冇現代世界咁多娛樂，主要係去酒吧飲酒、搵女人傾偈或者賭21點。想間中消遣吓，可以喺接任務時順便打獵，因為皮毛、爪、骨等全都可以賣錢，賺到錢就有得玩！據開發小組所講，《RDR》收錄嘅兩幅美國西部地圖同一幅墨西哥地圖，面積比《GTA Ⅳ》大得多，而且冇車揸，行勻幾個地圖都幾長途跋涉o架。
遊戲任務有好多類型，由押送犯人交換人質，到同墨西哥軍方合作進攻敵方據點都有，但最經典同最刺激係騎馬保衞行駛中嘅火車，兼要擊退埋伏四周嘅大量馬賊，似足睇牛仔片。武器方面花樣唔算多，例如有步槍、霰彈槍、手槍以及小刀、斧頭呢類近距離攻擊武器。
《RDR》引入「Dead-eye」攻擊系統，除咗好似「Bullet Time」咁將時間變慢畀玩家爭取時間瞄準同開槍之外，更能在多個目標畫上記號然後先開槍狂掃，想射中敵人手手腳腳再生擒就最啱。值得一提係開槍擊中敵人唔同部位會有唔同動作及反應，唔係咁多遊戲做得到。
類型：動作
開發：Rockstar San Diego
平台：Xbox 360、PS3
推出日期：5月21日
售價：$379（Xbox 360）、$419（PS3）
查詢電話：6098 3678