MGS Peace Walker蛇叔連線變芒亨
憑蛇叔的魅力同埋今次新增育成玩法兼多人連線任務模式，早就吸引到萬千機迷，連日本《Fami通》雜誌都為新遊戲《Metal Gear Solid Peace Walker》打出40分滿分。原來今次Konami仲同Capcom《Monster Hunter 2nd G》Crossover，加入蛇叔屠龍的特別關卡，可以四人合作用槍炮屠龍，真搞嘢！
首玩6人連線合作
《MGS PW》同《芒亨》Crossover而出現的「Monster島」特別關卡都幾搞笑，用現代武器打幾款惡龍，而且烤肉亦變成烤軍糧，勁過癮。主菜當然係主線故事同新增的多人連線任務模式，故事設定在1974年的南美，蛇叔成立無國界部隊幫助哥斯達黎加抵抗神秘勢力，基本玩法仍係靠潛入及埋身戰鬥完成任務。
《MGS PW》是首隻加入多人連線合作模式的系列作，最多可以支援6人Ad Hoc連線完成任務。當進行合作任務之時，成員身邊會圍上一個黃色圓環，只要隊員走入這個環之中，就可以發動合作狀態，分享武器及體力，而且當多幾個隊員「連體」，威力就再提升。
加入育成元素更耐玩
遊戲另一特別的地方是加入育成功能，不斷經營令蛇叔的Mother-Base基地壯大。管理基地一啲都唔容易，要賺錢應付基地支出同升級武器，好在士兵或者武器等有另一種方法得到。在戰場上打低敵方士兵後，可以唔將對方殺死，利用氫氣球將被俘的士兵運返基地，成為自己的僱傭兵，再派佢哋上戰場賺取金錢同經驗值，繼而開發出火力更強大的武器提升戰鬥力。除士兵以外，連裝甲車、戰車、武裝直升機等敵方武器都可用同樣方法運返基地再研發新技術。有咁多新玩法，無論係唔係《MGS》迷都應該買隻同朋友一齊開戰或屠龍啦！
迷彩《MGS PW》PSP同捆版
只有大Game先會推出遊戲同捆特別版主機，想當然今次亦有這款《Metal Gear Solid Peace Walker》PSP同捆版套裝，當中包括迷彩設計的PSP-3006主機跟遊戲，另加送兩個限定版軍事襟章及限定特製襟章鋁盒，靚到唔係Fans都要買呀。
「5.9」拜見神級製作人
以小島秀夫為首的《MGS》製作團隊會為新作《MGS PW》世界巡迴訪問，香港站定於5月9日，仲會聯同另一遊戲製作人新川洋司一齊到港。想得到兩位神級製作人簽名海報及限定軍牌，記得當日早點到場排隊，名額只得200名。
日期：5月9日
時間：2:00pm
遊戲資料
類型：動作
開發：Konami
平台：PSP
推出日期：已推出
售價：$298（PS Network Download）$299（UMD）
查詢電話：2341 2356
地點：奧海城二樓地下主題中庭
撰文：布偉倫 部分攝影：陳富權