從頭到尾食到涼透心

「夏日炎炎正好眠」,係嘅係嘅,但咪會浪費整個好時光?與其變懶瞓豬,倒不如等小記用美食刺激大家味蕾,即時醒一醒!各方凍食現已隆重登場,從頭盤、主菜到甜品,食完自然會由頭涼到落腳趾尾!

頭盤 沙律食極唔肥

感覺悶熱,大堆頭美食恐怕令人無福消受,或者少少哋食開胃前菜或頭盤仲好,例如王家沙的精緻涼菜,既有傳統上海風味,亦會創新用上青芥汁,甚為驚喜;至於H one則有客席廚師坐鎮呈獻正宗黎巴嫩及摩洛哥特色美食,讓味蕾細嘗異國風情。而主打沙律輕食的Applegreen設有自選沙律餐單,大廚建議食客可選其自家製芝麻薑汁及青芥辣汁作沙律Dressing,食落更加透心涼!

蟹肉牛油果青瓜沙律 大份$148、小份$80

牛油果與Applegreen自家製醬汁調和,混在青瓜條上,入口啖啖爽脆;新鮮蟹爪肉則切絲砌成他他形狀,冰涼鮮甜。

東方魅力華多夫沙律 $88

黑提乾連同西芹、蘋果、蓮慕、琥珀核桃等口感層次豐富,配合新鮮沙律菜夠輕盈,生果的甜味更帶來夏日感覺。

特「骰」生菜卷配冷麵 $88

雪梨、杧果、火雞肉、甘筍、青瓜、紅菜頭等配料全部切細粒,營造粒粒Cutie口感;生菜包着用日本豉油汁撈過的冷麵,凍食更能嘗到材料真味。

野菌拌金針菇 $38

近年菇菌大受歡迎,師傅便以上海野菌拌金針菇,跟麻油、生抽拌勻作涼菜,既豐富味道,亦沒有蓋過原來菌香,輕易便可清碟。

陳醋紅蜇頭絲 $48

海蜇頭肉質較厚,爽脆而有嚼勁,異常美味,還以上等陳醋作調味,令其更加滑脆醇香,酸中帶甜,味道層次愈見豐富。

青芥螺片 $48

驟眼看以為是巨型小籠包,實則是以薄薄的螺片炮製,揭開螺片即見到大豆芽菜,其中螺片豐腴細膩、味道鮮美,蘸點微辣的青芥汁伴食,很開胃。

Rocket Tabouli $48

有別於一般的沙律,火箭菜、番荽、番茄、紅洋葱及薄荷葉等全部切得細碎,配合麥碎,並只以橄欖油及少許鹽、胡椒粉調味,便可一啖過嘗到不同食材,亦很入味。(需兩日前預訂)

Dukkah Crusted, Blue-fin Tuna with a Beetroot and Cucumber Salad $178

煎香吞拿魚外層後,便會冷藏兩小時,其後取出吞拿魚切片,再在面層鋪上紅菜頭粒及青瓜粒品嘗,入口透心涼,食法坊間少見。(需兩日前預訂)

主菜 壽司料理賣相精緻

來到夏天,日本餐廳似乎比平日更受歡迎,皆因大部分日本菜如刺身、壽司等都是凍食,而且較為輕盈,食多咗都不會覺得熱血沸騰。逸東酒店Yagura居酒屋最近推出新Menu,料理、小食當中不乏涼浸浸選擇;而北角城市花園酒店的自助餐內,就以花作主題,將這浪漫感覺糅合壽司創作,加上靚靚賣相,實在叫人心動。

北海道鱈場蟹刺身 (約重180克) $198

刺身包括一隻鱈場蟹爪及蟹身,蟹爪啖啖肉而蟹身有膏夠甘甜,配上含有白醋的醬汁蘸點來吃,酸酸甜甜啖啖肉,開胃醒神。

櫻花漬醃三文魚、櫻花魷魚壽司、黑魚籽櫻花蝦

不約而同以「櫻花」作題材,令豐腴的三文魚及爽甜的魷魚,都添上淡淡花香,還有以黑魚籽配襯櫻花蝦,脆卜卜的口感討人喜愛。(「嚐.花宴」自助晚餐菜式之一,供應期至5月31日)

北海道牧場牛乳樽 $16/樽

北海道牛乳濃香醇厚,常被用來製作甜品,最新作便有這種牛乳樽,入口輕柔如慕絲,有黑芝麻、焦糖燉蛋、日本純牛乳及朱古力口味,甜度剛好。

荔枝紅茶千層糕 $28

師傅的糕點新作,與一般千層糕製法大同小異,但卻是一層奶配以一層荔枝紅茶,啖啖香濃軟滑,還散發荔枝香氣。(供應期至6月30日)

椰子香蘭葉雪糕 $38

除了花香,別忘了香蘭葉(即斑蘭葉)亦能散發芬芳,像這款雪糕加入香蘭葉炮製,比一般椰子雪糕更香更甜。

甜品 特色糕點口味冰涼滿足

介紹完凍食頭盤及主菜後,當然少不了最受女生歡迎的甜品。無論清爽、Creamy抑或香甜的甜品、蛋糕及雪糕等等,都能為食客洗滌味蕾,為豐富一餐畫上完美句號;而適逢日本櫻花盛放的季節,不少餐廳如Niji Bistro、和花亭壽司等都推出期間限定的櫻花芝士餅及雪糕,兩者皆用上真實的食用櫻花入饌,在淡淡花香映襯下,連甜品都來得特別可口動人。

杭州菊花凍糕 $28

菊花不時用來入饌,做甜品當然一絕,這杭州菊花就比一般菊花茶葉更清香,令凍糕在清新口味之中,增添甘醇滋味。(供應期至6月30日)

櫻花下午茶 $58

Niji Bistro自家以英國茶及櫻花樹葉調成櫻花紅茶,及將食用櫻花及櫻葉碎加入芝士蛋糕內,給味蕾來一次美麗享受。

香茅青椒意大利奶凍 $48

質感幼滑的奶凍,增添了香茅味,既用奶將香茅浸過夜,烹調時亦加入香茅,難怪如此入味,是不錯的新嘗試。

凍之撻 $4/件

凍之撻口味包括士多啤梨、蜜瓜、椰汁、杧果、朱古力及楊枝甘露,外形的骰,冰冰涼涼,食多幾個也不怕飽滯。

撰文:楊淑英、陳嘉勵

攝影:陳富權、陳世昌、梁偉德 (部分)

模特兒:Jija、Kit(hill Production)