近日被一個商場邀請，為他們設計一系列12套用木做主題的時裝作為展覽之用，好玩好玩！
好玩的原因有好多，首先是木頭跟時裝大纜都扯唔埋，一個硬一個軟，用番一個時裝人的慣用語去解釋：兩種物料都唔「相食」！好難搞！不過，我最鍾意向難度挑戰！
第二個好玩是去買木頭？香港邊度有木頭買？我話畀大家聽：係……無架！所以我今次所用的木頭全部都是由外國訂回來，簡直是不惜工本！勁呀！
第三個好玩是，我會將12套木時裝，分成四季，用不同的布料和顏色，將春夏秋冬四季展現於大家眼前……點解會分四季？因為我覺得木是最能代表四季的變化，春天的木，會長出嫩芽，充滿生氣；夏天的木，枝葉茂盛，非常有活力；秋天的木，落葉飄飄，浪漫蒂克；冬天的木，枯萎乾涸，離愁別緒……所以我這個木時裝系列用上四季這個感覺去做，我覺得真的適合不過。自吹自擂！嘩哈哈！
講咗咁耐，都未話畀大家知個展覽喺邊度？是尖沙咀活方商場，展期4月1日至17日，有時間過來睇睇啦！多多指教！
時裝設計師