Evelyn恨與Eason逢場作戲
誰說o靚字不出頭？別以為年紀輕經驗少便可小看！電影《歲月神偷》揚威柏林，令有份演出的八十後o靚模蔡穎恩（Evelyn）聲名大噪。雖然Evelyn的處女電影獲佳績，但仍會努力完成學業，遇到好劇本才考慮接拍。她最想合作的人竟不是影帝級人馬，反而是歌神陳奕迅。
早前羅啟銳、張婉婷合作電影《歲月神偷》凱旋歸來，令首次接觸電影的Evelyn因此成為焦點。她興奮地說：「其實我除咗開心，其他感受的確唔多，因為我拍戲仲係好新。雖然之前有拍過益力多廣告，而且咁啱大家都係懷舊背景同有喊戲，但前者就比較輕鬆。」
欣賞上一輩
「處女下海」的Evelyn有幸與影帝影后任達華及吳君如拍戲，加上唯一與他們的對手戲就要當眾哭泣，難怪Evelyn感到莫大壓力。她說：「當時有NG，但導演同其他演員都好有耐性教我，反而令我覺得唔好意思，所以畀自己好大壓力。」
《歲》片是導演羅啟銳小時候的真實故事。身為八十後的Evelyn，看到上一輩人對生命和工作的堅持，令她非常佩服：「佢哋思想同工作上嘅心態都好唔同，當時生活環境比較艱難，但佢哋一家人都可以開開心心，唔會奢求物質方面嘅嘢。」
已算在影圈「升呢」的Evelyn，坦言最想合作的人是陳奕迅（Eason）。自認是對方死硬派粉絲的她認真地說：「除咗Eason嘅歌我首首都會聽之外，佢所有電影我都有捧場。我最鍾意佢同容祖兒拍嗰套《神經俠侶》，佢拍得好有感染力。」
現時還是學生的Evelyn，有大部分時間需要返學，所以她不希望工作影響學業：「我真係唔想影響學業，當然期間有導演欣賞我，就要睇吓大家就唔就到時間、同埋劇本啱唔啱先盡量配合。」
喜歡上進男
八十後的年輕人被標籤為衝動派，喜歡在愛情路上轟轟烈烈。原來Evelyn早已有堅定目標，她說：「乜嘢都唔重要，最重要一定要有上進心，因為覺得有上進心嘅人好吸引，會成熟啲，同我同年紀都OKo架。（唔會思想未成熟咩？）呢啲嘢好睇經歷，可能細細個照顧細佬，嗰啲男仔已經好識照顧身邊嘅人，甚至比有錢男仔更加好，可以用雙手去努力令到將來幸福。」一直被傳與樂隊Mr.成員Tom拍拖的她，問到是否已找到幸福？她笑謂：「咁要睇吓先！」
好友評價
周秀娜：「好替佢開心，其實一路都覺得佢感覺好獨特，雖然未有時間睇，但睇宣傳片都知道佢演得好突出，希望佢可以抽多啲時間拍戲，讀完書之後可以投入電影工作。」
陳嘉寶：「其實當佢第一次試鏡成功，已經戥佢開心，連第二次關都過埋嘅時候，又同佢一齊緊張。佢拍緊戲未埋位時，都有打畀我傾偈。依家佢部戲得到獎，好似連我都有參與埋一份，佢拍得真係好好。」
何思諺：「知道佢部戲得獎，大家都好開心。我哋成班model都會捧佢首映場，希望佢可以得到今年女新人獎。」
影圈模以為繼
近年多位當紅模特兒轉型拍戲，結果大獲好評，證明多方面發展亦一樣掂。
林志玲
台灣第一名模林志玲獲導演吳宇森賞識，○六年處女下海拍《赤壁》演小喬一角，結果大獲好評。除獲邀拍續集，去年更有份入圍金像獎的「最佳新演員」。
Angelababy
港日發展的「潮模」Angelababy亦成為影壇新貴，早前兩部賀歲片《全城熱戀熱辣辣》和《花田囍事2010》亦有份演出，《全》片更在內地大收過億元票房。
熊黛林
「城嫂」熊黛林甫出道即走紅，○八年初登大銀幕與甄子丹合演電影《葉問》，上映後大收旺場，在內地收逾億元票房，令她成為億萬票房女星。
文：專案組
攝：吳文聰
服飾：Bling Bling
場地：Zense Cafe