香港冬天天氣時冷時暖，不過都無阻品嘗煲仔菜的風味。小記最愛煲仔飯，特別愛當中的飯焦，不過又怕瓦煲煲出又燶又硬的飯焦炭……幸好尚有其他款式煲仔各師各法，煮出更多味道香濃又健康的煲仔菜，風味猶在，冬日不妨多吃一點暖身心。

煲仔煮食學問多

要煮出金黃色而且軟硬香脆度適中的飯焦，最講求水分比例及時間掌握，用瓦煲的話，其扁平而薄的煲底受熱容易不平均，白飯要麼太濕不成焦，要麼就變炭焦，所以各家餐廳都各出奇謀。例如中環的喜双逢選用耐用的日本砂煲，傳熱均勻且保溫力佳，容易煮出香口微焦的飯焦；深水埗的富來紫砂飯店則用上中國紫砂鍋，其獨特物料不會烤焦食物，卻又可以煮出有「飯焦」的香口白飯，加上紫砂於受熱時會釋出遠紅外線，能穿透食物去激發食味，令每鍋菜式味道都原汁原味，食得健康。除了中國菜外，日本人亦喜以煲仔熬煮「鍋物」，像香港逸東酒店日式居酒屋Yagura就用上生鐵鍋熬煮海鮮粥及肉鍋，鐵鍋不易燶底、傳熱亦快，配合火爐暖着上菜，自然Keep住熱辣辣。

魚翅蠔豉菇粒煲仔飯 $88﹙例 ﹚$108﹙大﹚﹙b﹚ 蠔豉用上珍珠蠔炮製，粒粒夠大隻圓渾，加入雞髀肉拆成的嫩滑肉絲，再綴上魚翅，以多重層次營造「魚翅撈飯」的富豪效果。	原隻膏蟹煲飯 $238隻(a) 泰國入口膏蟹本身多汁，所以在煮飯時特別加入較少水分，加上每隻蟹足有十四両至一斤重，不止蟹黃多令飯充滿蟹鮮香，入口亦是啖啖肉。	鯪魚粒臘味糯米飯 $54﹙例﹚ $80﹙大﹚﹙b﹚ 糯米飯一般以炒製，但使用紫砂煲煮混合了糯米及粘米，原來同樣可以做到炒的效果，值得一提此店採用的臘腸為順德特產，香港只有此處可以品嘗。
踏入富來紫砂飯店，一個個燈籠讓全店變得紅噹噹，原來燈籠全由老闆娘簡太親手製造，款款不同甚具心思。	中環喜双逢設計簡約不失優雅，圓拱形卡位更是自成一角，最適合一家人分享暖笠笠煲仔菜。

撰文：黃穎妮

攝影：胡淑儀、陳富權、譚建章

查詢電話：﹙a﹚2810 5366、﹙b﹚3106 2528、﹙c﹚2710 1010