o靚模鍾蕙芝（Lavina）與師妹胡心諾（Rainbow）前晚拍住上出席J-Trend活動，Lavina自選大會贊助的低V短裙上陣，不忘以性感搶鏡，自評夠型又夠潮！講到舊拍檔周凱盈（Monique）的近況，Lavina順勢為被指與對方割席自辯：「雖然我哋之前同公司，但我哋唔係好親密，私底下冇聯絡，唔想做到大龍鳳咁，人哋一出事就話好friend又好關心咁，咁樣好似虛偽，我想做一個坦白誠實的Artist！」此外，Lavina亦大讚Monique有勇氣面對責任，並呼籲大家接受她。而Rainbow對於模特兒吸毒被指影響同行，她說：「法律唔容許吸毒，如果我有朋友吸毒，我都會阻止佢。」

同場的孫耀威表示聲帶已復原，新歌亦派台，對於無綫與HKRIA的版稅風波，作為環球歌手的他希望一人讓一步，盡快平息事件，他說：「我係呢件事之後第一個派新歌嘅人，都感到無奈，但我會無條件支持公司，同公司商量過計劃將新歌放上網。」對於譚詠麟表示將MV畀亞視及有線播，他說：「我做咗十幾年歌手，未試過咁做，希望無綫畀多啲錢公司，咁公司有多啲資源做歌。」