05年港姐季軍林莉近日被指受內地富豪「照顧」，突然富貴，更指該富豪開公司力捧她做「港版林志玲」。日前迴避回應傳聞的林莉，終於大方解畫否認傳聞，更言「暫時」不接受任何「照顧」。
近日有指林莉搭上內地富豪旋即集萬千寵愛，該富豪並開模特兒公司力捧，更指她身光頸靚常出入名店及住豪宅坐名車。日前迴避記者追問的林莉，前晚及昨日分別出席「慈善星輝仁濟夜」及「周大福賽馬日」任模特兒展示接近80萬元首飾時，均一改態度，大方回應，否認拍拖兼被「照顧」。
透露係W先生
林莉說傳聞是個美麗的誤會，只感到奇怪及無辜，加盟新公司數月內只見過老闆幾次，更以老闆低調為由不公開其姓名，只肯透露對方名字稱為W。「有人問我佢係咪結咗婚，我無見過佢太太或女友，我知佢欣賞我，唔係嗰啲鍾意，佢覺得我似林志玲，變咗放多啲資源喺我身上。」不過當問到老闆有否展開追求，她即緊張的說：「未……冇……冇，（有定係未追？）冇追。（同佢傾過傳聞？）無直接同佢傾，唔知佢係咪唔開心。」
對象有錢更好
至於會否接受富豪「照顧」，林莉說：「暫時都唔想，我唔係想做香港第一名模或翻版林志玲，今年目標好清晰做好模特兒工作，搵富豪或結婚都唔會諗，如果真係嗰啲嘢，都唔會見我成日出嚟做嘢啦。」她續說因做模特兒而置裝，也非傳聞所指的花費六位數字，又謂：「我冇住比華利山，真係好貴好唔方便。架車同屋係老闆嘅，當日同經理人上老闆度放低啲嘢。」問到會否找有錢人作對象，林莉說一切隨緣：「最緊要係對自己好，有錢當然更加好。老闆幾好，無同佢拍過拖，唔知佢對女朋友好唔好。」
文：名人組