當大家等緊合金魂出真三一等經典機械人時，新作GX-50已悄悄抵港，但竟是翻炒10年前（GX-03）超力電磁俠COM-BATTLER V，起初確實有點失望，不過玩上手無論變形合體、用料上色都大幅改善，最正係加入多款變態武器，好似電搖搖、毒龍鑽……對敵人施以極刑就最啱。
瞓低變戰車
就算70年代未睇過《超力電磁俠》，打《機戰》時一定見過五機出招，1號至5號機分別是電磁噴射機、電磁爆擊機、電磁坦克、電磁潛艇和電磁裝甲車。今次每架都作出小改動，好似1號機可揭開駕駛室、5號機型伸出電鑽等，分體都勁好玩。
五機合一後可變成重型戰車（Gran Dasher），雖然只係瞓喺度，再轉一轉手部和腳部車轆，但可忠於原著演繹算是交足功課。最驚喜反而係跟機配件，可以將潛艇改裝成3號坦克的運輸機，足見細心。
大鐵鉗
舊版電磁俠要顧合體又要出招，搞到可動性極低，今次改良關節設計，學足原著可以雙手拍埋出大鐵鉗和超電磁Crane。
大飛彈
以前卡通片的武器招式都勁誇張，粒飛彈隨時大過支槍，不過又幾討人歡心，只是今次超力電磁俠粒飛彈由下體位置射出，同愛美神導彈一樣咁尷尬。
毒龍鑽
超力電磁俠有咁多絕招，但往往K.O.對手的總是超電磁旋轉，只要舉起雙手拍埋，再換上毒龍鑽就搞掂，而頭部可以扭至仰起角度就比前作更神似。
電搖搖
電磁俠的超力搖搖攻擊，電光由PVC透明組件造成，裝在雙手像真度一流，惟搖搖的尖位都幾易爛。
穿心錐
當年大部分機械人都係拎大劍，只有超力電磁俠拎兩支穿心錐打架，必要時還可將兩支結合成長矛，配合機動性更高的關節，擺甫士比上代更加靚仔。
撰文：鍾鎮科
攝影：陳世昌
查詢電話：2433 1828