鋼琴王子陳雋騫小登科，前晚舉行婚宴宴請親友，將於明年底與老婆楊千嬅擺酒的丁子高，單拖到賀之餘亦乘機取經，更以過來人身份教新人夫妻相處之道，就像他和千嬅般要互相欣賞。

陳雋騫與陳曦蓓前晚假尖沙咀喜來登酒店舉行婚宴，席設卅八圍宴請一眾親友，丁子高（Real）、黃伊汶（Emme）、文恩澄和羅苡芝等均有到賀。

楊千嬅	丁子高（左）到賀一對新人，他亦乘機取經。

大家互相欣賞

單拖到場的Real，說老婆千嬅太忙未有前來：「佢好忙，我都好少見。（為明年擺酒取經？）學吓嘢啦，前兩個星期見到新郎佢話過兩個禮拜後結婚，我當時先知。（同你一樣咁神秘？）佢唔需要咁，我都係第一次見佢太太。（教新人夫妻相處之道？）要識得欣賞對方，唔好諗對方嘅壞處，有時千嬅坐喺度唔出聲，我都好鍾意佢，兩個人要互相欣賞。」至於他們籌備的婚宴仍進行中，估計是明年11月或12月搞，待千嬅先完成演唱會，但是年尾易撞頒獎禮？Real說：「好過喺concert前，可以影婚紗相先，但去邊度影仲未知，應該冇乜機會去第二度。」

黃伊汶與新郎陳雋騫是舊同學。	一對新人切完蛋糕情深一吻。	陳雋騫（左）與太太陳曦蓓的婚照。

滑雪跪地求婚

Emme原來與新郎陳雋騫在加拿大讀書時已認識，她表示代理的手錶生意很好，聖誕節亦會送手錶給朋友，問男朋友可有份？她即說：「冇呀！」之後匆匆走人。另外，新郎陳雋騫談到求婚過程，原來在日本滑雪時跪地求婚，陳曦蓓即說：「當時凍到手指差啲戴唔到戒指。」陳雋騫大讚太太樣樣都好，二人相識八年已拍拖多時，最難忘是期間遇上波折，難得太太接受他，如今30歲結婚，32-35歲生BB最好。新娘子也大讚老公細心，對人好好，陳雋騫笑言：「佢鍾意我應該唔係因為我識彈琴。」新人計劃去法國度蜜月。

文：名人組