放大圖片

甜圈．針孔影出環保聖誕

本文重點

舊鏡重生影聖誕
DIY甜圈鏡冧女友
機蓋變針孔玩Mood
螢光棒光畫傳愛意

香港人換機速度堪稱全球之冠，舊年玩單反近來又興Micro 4/3女友一號（GF1）和PEN （E-P2），人人拎住新機迎聖誕，不過奧巴馬都話要環保減排，想GF1、E-P2等新歡物盡其用，其實只需將沒用的Filter和機蓋，做些手作仔就可玩有趣的甜圈和針孔特效，用來影聖誕人像和燈飾增添節日氣氛。

舊鏡重生影聖誕

自從換鏡DC仔面世後，床下底批舊鏡開始封塵，最慘專為Micro 4/3設計的長短炮支支都咁貴，好彩有不少副廠推出Canon、Nikon、Leica等鏡頭轉接環，令舊鏡都可裝上GF1、E-P2使用，只需啟動「Shoot w/o Lens」設定配以手動模式，影聖誕情景要幾Wide有幾Wide，彷彿令舊鏡重生。

Olympus PEN E-P2的好處是輕巧之餘可以換鏡升呢，出街既可玩Snapshot隨拍又能夠換鏡扮影友。E-P2連14~42mm鏡頭售價：$8,990（a）	試拍場地：尖沙咀海港城「花仙子」聖誕花園拍攝方法：拎住Micro 4/3玩Snapshot，扭鏡Zoom埋去快速捕捉聖誕溫馨場面。	巿面有不同的副廠接環供Panasonic GF1接上Canon、Nikon、Leica等鏡頭，令舊式手動鏡可重生。GF1連20mm鏡頭套裝售價：$7,490（b）、接環售價：$480~$680（c）
試拍場地：中環IFC聖誕「夢．飛翔」飛船拍攝方法：想影出飛船氣勢可換支Wide Angle低炒，咁就唔使行到老遠避人頭。

DIY甜圈鏡冧女友

想影燈飾時冇咁單調，唔一定靠換鏡Zoom來Zoom去，肯花心思亦可化腐朽為神奇，好似常見的反射鏡甜圈效果（見圖），其實只要用平價或沒用的Filter，在中央用膠紙貼上圓形黑卡，便可將燈飾的光點幻化成一圈圈形狀，影女友更加Sweet。但拍攝時謹記焦距要150mm以上才見效果，手動對焦會較易成功。

甜圈效果是由反射長鏡造成，若沒有反射鏡的話可搵塊冇用的Filter，在中間用膠紙貼上圓形黑卡紙頂檔，拍攝時記得用長焦距配合手動對焦較易成功。

甜圈效果是由反射長鏡造成，若沒有反射鏡的話可搵塊冇用的Filter，在中間用膠紙貼上圓形黑卡紙頂檔，拍攝時記得用長焦距配合手動對焦較易成功。

長鏡容易做出前清後朦（淺景深）效果，令背後燈飾頓時變成一點點夠浪漫。

加入甜圈濾鏡後令燈飾由一點點變做一圈圈，但要注意對焦和偏暗情況。

機蓋變針孔玩Mood

嫌Micro 4/3鏡頭太貴的話，大可廢物利用將機蓋變成針孔鏡頭，拍出另類聖誕。做法亦唔複雜，去鴨記花十數元買個Micro 4/3機蓋，先在中間用鑽或螺絲批開一個洞，再貼上黑色膠布封實（或加一層薄鋁片、錫紙），最後用針拮一個小孔，利用針孔成像原理把光線直接投射在CCD上，玩埋黑白和懷舊模式就更有Mood。