官恩娜（Ella）出席活動時被麥玲玲師傅指她有雙孩子眼，易被男人呃，她亦坦言曾慘被男人欺騙，雖然她表示傷心事過了不要再提，但仍直斥對方為大壞蛋。

Ella和朱茵兩位大眼靚女昨日一同為Estee Lauder新品發布會擔任嘉賓，兩人在台上還即場獲麥玲玲師傅為她們分析眼運，Ella被指擁有一雙孩子眼，易被男人欺騙，不過師傅指她現在已大個女，不會再被男人騙。而師傅就指朱茵的眼睛屬桃花眼，會不時為男友帶來驚喜。

曾與吳卓羲傳緋聞的Ella受訪時表示師傅說得很準確，笑言自己以前是個傻更更的黃毛丫頭，被問到有否被男人欺騙過？她坦言：「都有畀男仔呃過，啲傷心事過咗去唔好提，我一陣都要請教朱茵點樣同阿Paul（黃貫中）十年都仲咁好。」

將來想生四個

至於是被騙財抑或騙色，Ella就有口難言地說：「好難答，總之佢就係一個壞人。（經過嗰次之後有冇學精到？）我覺得自己好好彩，遇到好多人都好錫我，人生一定有起有跌，我好開心遇到唔好嘅經歷，我身經百戰，遇到更壞嘅事都識應付，畀錢都學唔到。（咁嗰個人都衰到貼地喎？）佢係我活咗咁多年最壞嘅人，係大壞蛋。」對於被師傅指她子女宮好，將來會生4至5個，她開心地說：「如果生到4個就太好喇，我鍾意大家庭，不過唔係依家生，我要努力做嘢搵多啲錢先。」

麥玲玲師傅即場為Ella及朱茵指點迷津。

楊洛婷同樣以性感裝扮出席活動。

曾遇七年之癢

另外，朱茵原來不知不覺已跟男友阿Paul拍拖十年，問她可有遇過七年之癢？她說：「每對情侶都會遇過呢個關口，我哋嘅七年之癢唔係第三者嗰種，而係以前可以包容到佢嘅嘢，耐咗唔知點解淨係睇到佢嘅缺點，但係睇唔到佢嘅優點，但其實係好鍾意佢㗎喎，我依家會提醒自己要記住欣賞對方。」　　　　

文：名人組