17/12/2009

播放本新聞相關短片

跟周中曼遊 偷泥又偷師

周中師傅又帶大家搵食嘞!繼上次去馬來西亞,今次又到泰國曼谷大擦一餐,更殺入地道街市買材料玩煮飯仔,師傅話遊街市最緊要識「偷泥」!吓?偷嘢已經唔啱,仲要偷泥?周中笑道:「唔係叫你去偷泥,這是泰文,即係問幾多錢咁解,你唔問又點買嘢?」又係喎!之後跟住師傅這邊偷吓泥,那邊偷吓泥,買齊材料去開Sawaddi美女廚房,仲向周師傅偷師!

特派記者:羅安琪

鳴謝:永安旅遊、泰國國際航空公司、New Way Travel Co. Ltd. 模特兒:Pinpi

名人街市 乾淨便宜

印象中東南亞地道街市都幾恐怖,蒼蠅滿天飛、地下濕淋淋,不過有周中師傅喺度,當然唔會帶大家去捱苦啦!今次目的地Aor Tor Kor街市,是當地名人街市,地方大又乾淨,食材夠新鮮,更有二百多個井井有條的攤檔任你行,有齊各種海鮮、肉類、生果、乾貨、熟食等,同行的永安旅遊總經理JoJo同模特兒Pinpi都大讚行得舒服,難怪當地不少貴婦甚至泰國總理都嚟買餸。

走着走着,面前食材看到眼都花,有些食品已寫明價錢,沒有寫的怎麼辦?就學師傅講:「偷泥!偷泥!」小販會用計數機篤給你看,有時仲可以講吓價添!來到生果檔,師傅睇中厚肉榴槤還有生杧果,都係偷吓泥就輕易買到。那邊的攤檔又有靚蝦乾,有鮮橙色跟較啞色的,當大家都想買鮮色那包時,師傅立即話:「當然啞色好,鮮色已經過染色,無益的!」跟住周中果然唔會「盲舂舂」!最後他到海鮮檔買咗成條德國肥腸咁大的大頭蝦,仲話揀肉要夠實淨,軟腍腍的就唔夠新鮮,買完就去開餐了!

Aor Tor Kor街市

地址:Chatuchak area, Bangkok

周中娥姐 雙劍合璧

買完材料,我們移師到當地著名的娥姐私房菜煮餸,餐廳招牌菜手撕通菜、咖喱炒蟹,相信不少人已嘗過,不用多介紹。剛才買到的大頭蝦咁新鮮,師傅當然要立即大顯身手煮番餐,今次除了有美女模特兒外,更有餐廳老闆娘娥姐出手相助,直情是泰國版美女廚房!

兩大高手惺惺相惜,第一次合作已非常合拍,師傅把大蝦去頭切開,放落鑊「走油」,「咋」一聲大蝦已轉了橙色,再落鑊炒香加調味,這時師傅一邊炒,娥姐一邊調味,又加魚露又加胡椒,師傅最後更表演拋鑊,極有大牌檔風味,這時他又說要落多啲鹽:「泰國人嗜鹹㗎,大家唔鹹咩?鹹啲惹味啲吖嘛,係唔係先?」睇住師傅煮餸,夠晒娛樂性,話咁快就上碟!菜式名為「彩雲焗大蝦」,名字來自娥姐女兒阿雲,搞到娥姐跟女兒勁開心,大頭蝦食落啖啖肉,彈牙又鮮味,食到停唔到口,連娥姐都大讚師傅好手勢,今次我又偷到師嘞!

娥姐私房菜

地址:68/2 Sukhumvit 20,Sukhumvit Road, Bangkok

遨遊備忘

簽 證:持特區護照及BNO均毋須簽證

旅行團:永安旅遊美食在曼谷~名廚周中師傅4天滋味無窮之旅(BKY04X)1月28日出發,團費$5,799起。查詢:2928 8882

貨 幣:HK$1約兌4.3 Baht

天 氣:12月約22℃~33℃