身為名模的「黎明嫂」樂基兒，早前為時裝品牌擔任設計師，自然充滿fashion sense，對時裝潮流瞭如指掌的她就教大家以最潮靚look過聖誕。不過她笑言不會為老公充當stylist，因他早有自己的穿衣之道。

樂基兒（Gaile）雖然已為人妻，但卻沒有半點師奶味，經常遊走各大時裝騷的她，潮流觸覺依然敏銳，今個秋冬她就以自己喜愛的style，再配合至潮fashion trend，教一眾愛靚女生們如何以熱爆item扮靚靚，她說：「我好鍾意帶啲Punk rock味道嘅打扮，我覺得係我嘅style，好『Gaile』。我一早已經話西裝褸會好hit，今個秋冬就好興着西裝褸喇，slim cut會令個身形線條更靚更修長，而且百搭易襯，簡簡單單就好有型格。」

以粗皮帶作褸裙的束腰之效，再以織花絲襪襯底，女人味十足。	以千鳥格孖襟褸配搭長靴，盡顯Mix & Match的趣味。	Gaile點中修身剪裁的西裝褸乃今季的潮物。

不一定要黑沉沉

說完上半身，Gaile繼續大談下半身的襯法：「仲有依家好興Leggings，無論係淨色定有pattern嘅，着Leggings襯boots好好睇，又型。如果着淨色梗係襯咩都得，着有pattern嘅就唔好配襯啲太花巧嘅服裝，唔係就突出唔到個效果。就咁一件長身上衣加Leggings同boots都好靚。」至於冬日顏色方面，Gaile認為不一定要黑色，因為冬天非只得黑色：「雖然黑色感覺cool啲，但好似桃紅色呢啲咁sharp咁colourful嘅顏色，今年都好興。」

毋須為老公襯衫

雖然Gaile對時裝潮流十分熟悉，可是她表示不會為老公黎明（Leon）入貨襯衫：「無話刻意入貨，只係有時見到啱佢嘅就會買。佢着衫唔使我畀意見，佢有自己一套，知道鍾意啲咩。佢其實比較崇尚自然，好多時都係T恤牛仔褲。」雖然Gaile曾笑言Leon穿衣沒品味，經常T恤牛仔褲，但她亦曾公開大讚老公謂：「佢天生唔使點整已經夠好睇、夠靚仔！」可見Leon無論穿甚麼，看在Gaile眼裏都是同樣吸引。

採訪：名人組

服裝：bread n butter