約了三五知己回家搞聖誕派對，除了燒番隻火雞焗番塊薑餅大宴親朋外，細心的應該還要買定幾隻應節聖誕影碟，讓朋友等食時都可以有節目。平時最愛煲碟的戴夢夢就專程去唱片舖揀選了多隻心水影碟推介給大家，無論你喜歡睇劇情片、笑片或動畫，都肯定有套啱心水。

新片組溫馨搞笑

不要說聖誕流流在家煲碟太悶，如果可以同男女朋友溫馨開心地煲番套新片，其實好過出街同人逼。

我們的大鑊假期最抵死

此片的英文原名是《Four Christmases》，講述男女主角每逢聖誕都會往熱帶地方度假，無非要避開4個麻煩多多的家庭。但今年卻避無可避，被迫一日內應付4個家庭，就好像要經歷4個可怕的聖誕節。故事雖然簡單，但勝在對白搞笑抵死，令人回味。售價：$148（DVD）

寶貝狗開心救聖誕好得意

日本拍攝狗電影，慘情指數通常達爆燈級，誓要觀眾一邊睇一邊淚流滿面，反觀荷里活狗片就開心得多，《寶貝狗開心救聖誕》描述6隻狗為拯救聖誕而踏上刺激冒險旅程，故事有點天馬行空，但勝在睇得開心。售價：$149（DVD）

沖天救兵感人回味

單是睇開場不久，卡叔那幕感動到爆的回憶場面都已經值回票價。售價：$329（Blu-ray）

觀能刺激組心跳加速

聖誕節炸機有個好處，就是鄰居應該不會那麼早入睡，炸夜點都不怕有人投訴。

變形金剛2炸機一流

柯柏文森林一戰以一敵三最後戰死一幕真是太感動了……米高，快點拍第三集啦。售價：$329（Blu-ray）

未來戰士4科幻經典

今次以未來為背景，還以為可以一舉K.O.天網，殊不知又是原地踏步，好像睇緊悟空打菲利，打極都打唔完。售價：$249（Blu-ray）

經典組百看不厭

可能電視台已重播過無數次，但每次一播你都會乖乖哋坐在梳化由頭睇到尾，經典就是這回事。

真的戀愛了浪漫窩心

至今仍是不少人心中的愛情經典，劇本高招在能以一、兩幕的短短十數分鐘，就能細膩地刻劃出人物性格。雖然全片包含10個小故事，多達20位紅星登場，但有人人都是主角的感覺，當年姬娜萊莉仍未做《魔盜王》，婚禮出場一幕靚到令男觀眾O晒嘴。售價：$69（DVD）

怪誕城之夜搞鬼過癮

雖然現今荷里活CG技術出神入化，但戴夢夢覺得仍未有其他電影的搞鬼過癮程度能及得上《怪誕城之夜》，鬼才添布頓在本片充分表現出強烈個人風格的美術、創意及黑色幽默。最近迪士尼更利用數碼立體技術來重製此片，可見此片絕對是經典中的經典。售價：$155（DVD）

寶貝智多星鬼馬童星

唔經唔覺，原來《寶貝智多星》已是19年前的作品，電視台每逢聖誕節都喜歡重播這套戲。無論你幾熟悉戲中的情節，但睇到小鬼Kevin整蠱兩個傻賊的每一幕，仍能令你笑到反肚。售價：$85（DVD）

撰文：周仲明

攝影：方偉堅

髮型：Steve@Hair

場地提供：香港唱片

查詢電話：2265 8299