今日東亞運動會正式揭幕，難得有機會親眼睇劉翔跨欄、超級丹殺波、郭晶晶跳水，梗係要拎定相機影低精彩每一刻，不過場內距離偶像咁遠，又用唔到閃燈，點影先至靚呢？一於請香港運動攝影協會會長Aries教大家幾招捕捉現場氣氛，第時影陸運會、賽馬和家庭活動都包冇甩拖。

第一招：陷阱式對焦 等劉翔入鏡

運動攝影常用長焦距去捕捉移動中的主體，所需的安全快門和對焦速度要求較高，可能在起步點對完焦，劉翔已飛咗去第三、四個欄，追都追唔切。其實想捕捉劉翔跨欄英姿，大可先揀定一兩個欄位對焦，等主角快入鏡時連環快拍，就算速度較慢的機仔都影到靚相。

香港運動攝影協會會長Aries，今年獲邀做東亞運動會攝影，將在場內捕捉22項賽事。	一場跨欄賽事只得十幾秒，要追住劉翔及要對到焦很困難，應預先揀定一兩個欄位，等劉翔跳進畫面。	觀眾席離跑道頗遠，若鏡頭唔夠長可加裝1.4x至2x增倍鏡，或使用長倍變焦Prosumer DC。

第二招：自訂白平衡 Tune靚林丹

影相最難是應付光源問題，尤其是室內射燈、綠色草地、紅色場地等都會影響白平衡偵測，令相片又黃又綠，所以切忌使用自動白平衡。Aries建議專業攝影師可用ExpoDisc濾鏡測光，如沒有的話可用白卡、甚至白紙巾「自訂白平衡」，鎖定同一色溫，後期執相都易啲。

AUTO模式遇到綠色場地常會偏色，最慘係張張唔同色溫令Tune相更麻煩，所以應選擇「自訂白平衡」。

很多單反和Prosumer DC都內置自訂白平衡，啟動後只要對住白卡、白紙巾或加上ExpoDisc濾鏡影一張相，便可鎖定現場色溫。

第三招：Pan鏡特效 營造速度感

想表現出動態感覺，可嘗試捕捉運動員跳躍、騰空等動作，或透過Pan鏡營造速度感，方法是將鏡頭跟隨主體移動拍攝，以身體作支架水平轉動腰部，由遠開始抓住移動節奏，初學者取景拎Wide一點較易成功，並要留意背景唔好咁齋才可凸顯主體的速度感。

Pan鏡可用於田徑、單車等項目，配合主體移動節奏由遠開始追蹤，令主體清晰之餘，背景帶動感效果。

Pan鏡主要以身體為支架，扭動腰部追蹤目標，雙手記緊保持穩定平衡，唔好郁來郁去。

運動攝影 長炮DC都掂

別以為頂級大機才可影到運動攝影，隨着相機連拍速度提升、高ISO畫質處理改善，普通單反配支長鏡，甚至長倍變焦Prosumer機種，都一樣能影出專業水準，最緊要是了解器材本身的性能，便可發揮攝影技巧。

終極夜攝武器 Nikon D3S

Aries今次影東亞運動會將會拎Nikon D3S上陣，除了因為9fps全片幅連拍速度，最主要是ISO雜訊處理大幅改善，就算去到ISO 12,800都能影出細緻畫質，閃燈射唔到亦可於昏暗環境影靚相。

頂級APS-C 單反Canon EOS 7D

身為東亞運動會鑽石夥伴的Canon近期力谷EOS 7D，其APS-C規格優點是可將長鏡焦距乘1.6倍，配合Dual DIGIC 4處理器，就算連拍1,800萬像素相片，速度可達每秒8張，仲可拍埋全高清影片。

長炮Prosumer DC PowerShot SX20 IS

嫌長鏡貴的話可選擇Prosumer DC一機走天涯，PowerShot SX20 IS備有28~560mm 20倍光學變焦鏡頭，配合USM馬達和IS防震功能，遠近都能準確捕捉，同時支援DC仔的場景和拍片多種模式。

撰文：鍾鎮科

部分攝影：盧展程

模特兒：Serena（Talent 100）

查詢電話：（a）2882 3936、（b）3191 2333