情迷日本文化，連狗都唔放過，Bowie都算係典型哈日族。原來他之所以有股養狗的衝動，全因看了《老友狗狗》、《八公犬物語》等日本電影，被戲中的感人情節吸引住，結果養了一隻又一隻，令同一屋簷下住了5隻秋田犬加20頭柴犬，亦再一次證明電影的動人魔力。
撰文：司徒德琳 部分攝影：梁偉德 部分相片：由被訪者提供
為柴犬變繁殖者
「早年睇過一套日本片叫《老友狗狗》，講述柴犬與主人的溫馨故事，拍得好感人，因此當初考慮養寵物，第一時間想起柴犬。」據Bowie表示，以往很少寵物店售賣柴犬，惟有託朋友聯絡繁殖者，結果於3年前迎來第一頭狗女「芝麻」回家。「『芝麻』品性溫馴、乖巧，討人喜愛，更曾於狗展中取得永久冠軍獎項，令我愈來愈喜歡柴犬，後來更當上繁殖者。」
熱情性格惹人愛
現時Bowie養了20頭柴犬，當中以「芝麻」的囝囝「肥龍」最深得歡心。「『肥龍』，影相喇，唔好走埋去攝影哥哥度。」一聲令下，性格熱情的「肥龍」，即時坐定定兼Show出一副Happy Face，如此聽教聽話，唔做PR狗嘥晒！「一般狗仔都怕影相、怕閃光燈，『肥龍』不知幾鍾意擺甫士，影相又定，仲識笑添，十分盞鬼！我個女都好鍾意同『肥龍』玩，細個嗰陣仲當『肥龍』係馬仔咁騎……」
有趣的是，「肥龍」不但是Bowie家中的開心果，更成為一班狗仔眼中的大阿哥。「可能是恃寵生嬌吧！牠對狗女會好一點，對其他狗仔則擺出一副大哥格，只會畀面爹哋『幸龍』。」拍攝當日，比「肥龍」大幾個碼的秋田犬「藏丸」，一見「肥龍」現身，即退後一步禮讓對方，場面好搞笑！
被電影情節打動
除了柴犬，Bowie的大家庭於今年初又多了5位新成員，全屬秋田犬。原來Bowie從網上得悉傳誦千古的八公犬故事被拍成電影，戲中的秋田犬忠心耿耿，令他隨即愛上這種日本國犬。
秋田犬屬中大型犬，需要有一定空間活動和散步，因此Bowie特別為5隻秋田犬預設寬敞的居所。「其實秋田犬不難養，每星期只須洗澡一次。值得一提，秋田犬擁有雙層披毛，天熱時一定要給牠開冷氣，出外時亦需預備大量食水！」
以忠心護主聞名
不少朋友以為秋田犬「好惡死」，其實牠們本性溫馴、善良，並以忠心護主見稱。「以『藏丸』為例，雖然來港只有短短幾個月，但只要我用普通話叫牠『握手』、『坐下』，即乖乖遞手仔、坐定定，非常醒目。其實只要在狗狗扭計時，立即大聲制止，讓牠們知道對錯，牠們很快就會學識規矩。」看來要「藏丸」像日本「八千公」一樣忠心地留在車站等候主人，絕非天方夜譚！
秋田犬 Akita Dog
特徵：成犬體高約66.6cm，身長約55~70cm；毛色分白色、赤色系（淡啡加白）及黑白相間；披毛直而硬，表面明亮有光澤。體形強狀有力，胸肌發達，體味較濃。
性格：強悍、忠心、沉着、穩重；跟陌生人會保持距離，但不會胡亂吠叫或咬人，若自幼加以訓練，會變得平易近人。
柴犬 Shiba Inu
特徵：成犬體高約39.5cm，身長約32~42cm，毛色以棕黃色及黃褐棕色為主，亦有黑色白底或黃底等顏色。披毛直而硬，內層披毛柔軟厚實，體味較淡。
性格：聰明、敏捷、開朗，但有點固執，對主人忠心耿耿。